இலங்கையில் இந்த ஆண்டு டெங்கு காய்ச்சலால் உயிரிழந்தவர்களின் எண்ணிக்கை 62 ஆக உயர்ந்துள்ளது. இதுவரை நாடு முழுவதும் 84,724 பேர் டெங்கு தொற்றால் பாதிக்கப்பட்டுள்ளதாகத் தெரிவிக்கப்பட்டுள்ளது.
கடந்த ஜூன் மாதத்தில் 21,533 டெங்கு பாதிப்புகள் பதிவாகியிருந்த நிலையில், ஜூலை மாதத்தில் மட்டும் 29,350 புதிய பாதிப்புகள் பதிவாகியுள்ளன. 2026ஆம் ஆண்டில் இதுவரை பதிவான அதிகபட்ச மாதாந்திர பாதிப்பு எண்ணிக்கையாக இது அமைந்துள்ளது.
முந்தைய மாதங்களில் மாதாந்திர பாதிப்புகள் 5,000 முதல் 8,000 வரையில் பதிவாகியிருந்த நிலையில், ஜூலை மாதத்தில் ஏற்பட்டுள்ள இந்த திடீர் அதிகரிப்பு டெங்கு பரவலின் தீவிரத்தை எடுத்துக்காட்டுகிறது.
மாகாண ரீதியில் மேற்கு மாகாணம் அதிகளவில் பாதிக்கப்பட்டுள்ளது. அங்கு 44,829 பேர் டெங்கு தொற்றுக்கு உள்ளாகியுள்ளனர். இது நாட்டின் மொத்த பாதிப்புகளில் பாதிக்கும் அதிகமானதாகும்.
மாவட்ட ரீதியில் கம்பஹா மாவட்டத்தில் 17,971 பேரும், கொழும்பு மாவட்டத்தில் 16,814 பேரும் பாதிக்கப்பட்டுள்ளனர். இதற்கு அடுத்ததாக கண்டியில் 5,782 பேரும், களுத்துறையில் 5,626 பேரும் டெங்கு பாதிப்புக்குள்ளாகியுள்ளனர்.
தென் மாகாணத்தில் 17,378 பாதிப்புகளும், சப்ரகமுவ மாகாணத்தில் 9,110 பாதிப்புகளும், மத்திய மாகாணத்தில் 7,136 பாதிப்புகளும் பதிவாகியுள்ளன.
வடக்கு மாகாணத்தின் கிளிநொச்சி மாவட்டத்தில் 53 பேரும், முல்லைத்தீவு மாவட்டத்தில் 43 பேரும் பாதிக்கப்பட்டுள்ள நிலையில், நாடு முழுவதும் டெங்கு பரவும் அபாயம் தொடர்ந்து காணப்படுவதாக சுகாதார அதிகாரிகள் எச்சரித்துள்ளனர்.
தேசிய டெங்கு கட்டுப்பாட்டுப் பிரிவின் சமீபத்திய தரவுகளின்படி, 29ஆவது வாரத்தில் மேலும் 175 அதிக அபாயம் கொண்ட சுகாதார மருத்துவ அதிகாரி பிரிவுகள் அடையாளம் காணப்பட்டுள்ளன. இந்தப் பகுதிகளில் நாளொன்றுக்கு சராசரியாக 2,391 புதிய டெங்கு பாதிப்புகள் பதிவாகியுள்ளன.
தீவிரப்படுத்தப்பட்ட பொது சுகாதார நடவடிக்கைகள் முன்னெடுக்கப்பட்டு வரும் போதிலும், டெங்கு பரவலைக் கட்டுப்படுத்துவதில் தொடர்ந்தும் சவால்கள் காணப்படுவதாக அதிகாரிகள் தெரிவித்துள்ளனர். இந்நிலையில், டெங்கு உயிரிழப்பு விகிதம் 0.07 சதவீதமாகப் பதிவாகியுள்ளது.
இதனையடுத்து, நுளம்பு பெருக்கத்தைத் தடுக்கும் நடவடிக்கைகளை மேலும் தீவிரப்படுத்துவதுடன், டெங்கு அறிகுறிகள் தொடர்பில் அவதானமாக இருக்குமாறும் பொதுமக்களை சுகாதார அதிகாரிகள் வலியுறுத்தியுள்ளனர்.
