வெளிநாட்டு வேலைவாய்ப்புகளை நாடும் போது, தனியார் வேலைவாய்ப்பு நிறுவனங்கள் குறித்த நம்பகமான தகவல்களுக்கு, ‘1989’ என்ற தொலைபேசி எண்ணைத் தொடர்பு கொள்ளுமாறு வெளிநாட்டு வேலைவாய்ப்பு அமைச்சர் விஜித ஹேரத் (Vijitha Herath) பொதுமக்களை வலியுறுத்தியுள்ளார்.
அண்மையில் நாடாளுமன்றத்தில் நடைபெற்ற வெளியுறவு, வெளிநாட்டு வேலைவாய்ப்பு மற்றும் சுற்றுலாத்துறை அமைச்சக ஆலோசனைக் குழுவின் போது அமைச்சர் இதனை குறிப்பிட்டுள்ளார்.
அதன்போது, வெளிநாட்டு வேலைவாய்ப்புகளை ஏற்பாடு செய்வதாகக் கூறி மக்களை ஏமாற்றும் நபர்கள் குறித்து நாடாளுமன்ற உறுப்பினர்கள் எழுப்பிய கேள்விகளுக்கு அமைச்சர் பதிலளித்தார்.
முறைப்பாடு
மேலும், கூட்டத்தின் போது, இலங்கை வெளிநாட்டு வேலைவாய்ப்பு பணியகத்தால் (SLBFE) அங்கீகரிக்கப்பட்ட நிறுவனங்கள் மற்றும் கட்டணங்கள் தொடர்பான அனைத்து தகவல்களையும் பணியகத்தின் இணையதளத்தில் காணலாம் என்று தெரிவிக்கப்பட்டுள்ளது.
அத்தோடு, எந்தவொரு தரப்பினரும் அங்கீகரிக்கப்பட்ட தொகையை விட அதிகமாக வசூலித்தால் அல்லது உரிமம் இல்லாமல் ஏதேனும் செயல்பாட்டில் ஈடுபட்டால், SLBFEயிடம் முறைப்பாடு அளிக்கலாம் என்று அவர்கள் மேலும் தெரிவித்துள்ளனர்.