பாடசாலை விடுமுறையிலுள்ள மாணவர்கள் தொடர்பில் அவசர எச்சரிக்கை

பாடசாலை விடுமுறையிலுள்ள மாணவர்களின் பாதுகாப்பு தொடர்பில் விசேட கவனம் செலுத்த வேண்டுமென பெற்றோருக்கு லேடி ரிட்ஜ்வே குழந்தைகள் மருத்துவமனையின் பதில் இயக்குநர் டாக்டர் பிரதீப் ரத்னசேகர அறிவுறுத்தல் வழங்கியுள்ளார்.

பாடசாலை விடுமுறை நாட்களில் பட்டம் விடும் விபத்துகள் அடிக்கடி பதிவாகி வருவதாகவும் அவர் சுட்டிக்காட்டியுள்ளார்.

உயிருக்கே ஆபத்தை ஏற்படுத்தலாம்

அவர் மேலும் தெரிவிக்கையில், இப்போதெல்லாம் நிலவும் வறண்ட வானிலை மற்றும் பாடசாலை விடுமுறை காரணமாக, குழந்தைகளிடையே பட்டம் விடுவது பிரபலமாகியுள்ளது.

கவனக்குறைவாக பட்டம் விடுவது கடுமையான காயங்களையும், உயிருக்கே ஆபத்தான காயங்களையும் கூட ஏற்படுத்தக்கூடும்.

குறிப்பாக உயரமான இடங்களில் இருந்து பட்டம் விட முயற்சிக்கும்போது கீழே விழ நேரிடலாம். குழுக்களாகப் பட்டம் விடும்போது மோதல்கள் மற்றும் கீழே விழுவதால் விபத்துகள் ஏற்படலாம்.

உயர் மின்னழுத்த மின் கம்பிகளுக்கு அருகில் பட்டம் விடுவது மிகவும் ஆபத்தான செயல்.

எச்சரிக்கை

பட்டத்தின் நூல்கள் மின் கம்பிகளுடன் தொடர்பு கொண்டால், அந்த நூல் வழியாக மின்சாரம் நபருக்குப் பாயக்கூடும்.

இத்தகைய மின் அதிர்ச்சிகள், கைகள், புஜங்கள் மற்றும் மார்புப் பகுதிகளில் உள்ள உடல் திசுக்கள், இரத்த நாளங்கள் மற்றும் நரம்புகளுக்குக் கடுமையான சேதத்தை ஏற்படுத்தக்கூடும்.

சில சமயங்களில், சேதமடைந்த உடல் பாகங்களை அறுவை சிகிச்சை மூலம் அகற்ற வேண்டிய நிலை கூட ஏற்படலாம் என எச்சரிக்கை விடுத்துள்ளார்.

மேலும், மின் கம்பிகள் உள்ள பகுதிகளில் குழந்தைகள் பட்டம் விடுவதைத் தடுக்க பெற்றோர்களும் பெரியவர்களும் பொறுப்பேற்க வேண்டும்.

ஏனெனில் மின்சாரத்தைக் கடத்தும் நூல்கள் உடனடி உயிரிழப்பை ஏற்படுத்தக்கூடும் என சுட்டிக்காட்டியுள்ளார்.