நீண்டகாலமாகப் பதில்களுக்காகக் காத்திருக்கும் வலிந்து காணாமல் ஆக்கப்பட்டோரின் உறவுகளின் நலன்களை உறுதிப்படுத்துவதற்கு அரசால் முன்னெடுக்கப்பட்டுள்ள நடவடிக்கைகள் குறித்தும், உண்மை, நீதி மற்றும் பொறுப்புக்கூறலை நிலைநாட்டுவதற்கான நகர்வுகள் தொடர்பிலும் நீதி அமைச்சர் ஹர்ஷன நாணயக்காரவும், இலங்கைக்கான சுவிட்ஸர்லாந்து பதில் தூதுவர் ஒலிவியர் பிராஸும் விரிவாகக் கலந்துரையாடியுள்ளனர்.
நீதி, சிறைச்சாலைகள் மற்றும் தேசிய ஒருமைப்பாடு அமைச்சர் ஹர்ஷன நாணயக்காரவுக்கும் இலங்கைக்கான சுவிட்ஸர்லாந்து பதில் தூதுவர் ஒலிவியர் பிராஸுக்கும் இடையிலான இந்த முக்கிய சந்திப்பு நேற்று கொழும்பிலுள்ள நீதி அமைச்சில் நடைபெற்றது.
நீண்டகாலமாக நீதிக்காகக் காத்திருக்கும் வலிந்து காணாமல் ஆக்கப்பட்டோரின் உறவுகளின் நலன்களைப் பாதுகாப்பதற்கும் உறுதிப்படுத்துவதற்கும் அரசின் தரப்பில் எடுக்கப்பட்டு வரும் நடவடிக்கைகள் குறித்து இதன்போது ஆராயப்பட்டது.
மேலும், வலிந்து காணாமல் ஆக்கப்படல்கள் தொடர்பில் உண்மை, நீதி மற்றும் பொறுப்புக்கூறலை முழுமையாக உறுதிப்படுத்துவதற்கான எதிர்கால நகர்வுகள் குறித்து இரு தரப்பினரும் விரிவான ஆலோசனைகளை மேற்கொண்டனர்.
இலங்கையின் சமகால அரசியல் மற்றும் சமூக நிலைவரங்கள் குறித்துச் சுவிட்ஸர்லாந்து பதில் தூதுவருக்கு விளக்கமளித்த நீதி அமைச்சர், இவ்விரு துறைகள் சார்ந்த அரசின் எதிர்காலத் திட்டங்கள் மற்றும் நடைமுறைப்படுத்த எதிர்பார்க்கப்படும் தீர்மானங்கள் பற்றியும் தெளிவாக எடுத்துரைத்தார்.
கொழும்பில் உள்ள சுவிட்ஸர்லாந்து தூதரகத்தின் முதன்மைச் செயலாளர் திருமதி ஜஸ்டின் போய்லாட்டும் இந்தச் சந்திப்பில் உடனிருந்து பங்கேற்றிருந்தமை குறிப்பிடத்தக்கது.
