ஆளும் கட்சி உறுப்பினரை தாக்கிய காவல்துறை அதிகாரி: தீவிரமடையும் விசாரணை!

கொலன்ன பிரதேசத்தின் ஆளும் கட்சி நாடாளுமன்ற உறுப்பினர் சாந்த பத்மகுமார மற்றும் காவல்துறை அதிகாரி ஒருவரிடையே ஏற்பட்ட முறுகல் நிலை தொடர்பில் காவல்துறை விளக்கமளித்துள்ளது.

அதன்படி,  குறித்த சம்பவம் தொடர்பில் எம்பிலிபிட்டிய குற்றவியல் விசாரணைப் பிரிவு மூலம் விசாரணைகள் துரிதப்படுத்தப்பட்டுள்ளதாக காவல்துறை திணைக்களம் அறிவித்துள்ளது.

சம்பவம் தொடர்பில் காவல்துறை திணைக்களம் அறிக்கையொன்றை வெளியிட்டு விளக்கமளித்துள்ளது.

சம்பவத்தின் பின்னணி

மேலும் குறித்த அறிக்கையில்,

கடந்த 20 ஆம் திகதி இரவு 8.40 மணியளவில், சூரியகந்த காவல் நிலையத்தில் பணியாற்றும் காவல்துறை கான்ஸ்டபிள் ஒருவர் தனது கடமைகளை முடித்துவிட்டு வீடு திரும்பிக் கொண்டிருந்தபோது, ​​நாடாளுமன்ற உறுப்பினர் சாந்த பத்மகுமார உள்ளிட்ட குழுவினர் அவரைத் தாக்கி அவரது மோட்டார் சைக்கிளைத் திருடிச் சென்றுள்ளதாக 119 அவசர இலக்கம் ஊடாக கொலன்ன காவல்நிலையத்துக்கு முறைப்பாடு வழங்கப்பட்டுள்ளது.

அன்றைய தினம் இரவு 10.10 மணியளவில், தேசிய மக்கள் சக்தி இரத்தினபுரி மாவட்ட நாடாளுமன்ற உறுப்பினர் சாந்த பத்மகுமார, ஹல்வின்ன நோக்கி கெப் வண்டியில் பயணித்துக் கொண்டிருந்தபோது, ​​சூரியகந்த காவல் நிலையத்தில் உள்ள ஒரு காவல்துறை கான்ஸ்டபிள் தனது கெப் வண்டியை நிறுத்தி தன்னைத் தாக்க முயன்றதாகக் கூறி கொலொன்ன காவல் நிலையத்தில் முறைப்பாடு வழங்கியுள்ளார்.

இந்நிலையில், காவல்துறை கான்ஸ்டபிளின் மோட்டார் சைக்கிள் கண்டுபிடிக்கப்பட்டு, கொலொன்ன காவல்துறையினரால் கைப்பற்றப்பட்டதுடன் குறித்த அதிகாரி கொலொன்ன வைத்தியசாலையில் அனுமதிக்கப்பட்ட பின்னர் எம்பிலிபிட்டிய வைத்தியசாலைக்கு மாற்றப்பட்டார்.

கொலொன்ன வைத்தியசாலையின் மருத்துவ அறிக்கையில், அதிகாரியின் சுவாசத்தில் மது வாசனை இருப்பதாகவும், சிறுநீர் மாதிரிகளில் போதைப்பொருள் செறிவு இல்லை என்றும், அவர் மது அருந்தியுள்ளாரா என்பதை சோதிக்க இரத்த மாதிரிகளை அரசு பகுப்பாய்வாளர் அலுவலகத்திற்கு அனுப்ப ஏற்பாடுகள் செய்யப்பட்டுள்ளதாகக் குறிப்பிடப்பட்டுள்ளது.

எம்பிலிப்பிட்டிய பிரிவு குற்றப் புலனாய்வுப் பணியகம், எம்பிலிப்பிட்டிய பிரிவுக்குப் பொறுப்பான மூத்த காவல்துறை அத்தியட்சகரின் நேரடி மேற்பார்வையின் கீழ், இந்த சம்பவம் தொடர்பில் மேலும் விசாரணைகள் மேற்கொள்ளப்பட்டு வருகின்றது.

தேசிய மக்கள் சக்தியின் நாடாளுமன்ற உறுப்பினரின் மாமனாரின் வீட்டில் கஞ்சா கையிருப்பு தொடர்பில் குறித்த காவல்துறை அதிகாரி சோதனை நடவடிக்கைகளை மேற்கொண்டிருந்தமை குறிப்பிடத்தக்கது.