யாழில் உணவு வழங்க மறுத்த கிராமசேவகர்! எழுந்தது சர்ச்சை

அண்மையில் இடம்பெற்ற வெள்ள அனர்த்த்தின் போது பாதிக்கப்பட்டு நலன்புரி
நிலையத்திலிருந்த குடும்பங்கள் சிலவற்றிற்கு கிராம சேவகர் உணவு வழங்காமையால் அப்பகுதியில் ஆர்ப்பாட்டமொன்று முன்னெடுக்கப்பட்டுள்ளது.

குறித்த ஆர்ப்பாட்டம் இன்று (02.12.2024) பருத்தித்துறை பிரதேச செயலகத்திற்கு முன்னால் இடம்பெற்றுள்ளது.

உணவு முறையாக பகிர்ந்தளிக்கப்படாமை குறித்து கற்கோவளம் கிராம மக்களுக்கும், கற்கோவளம் கிராம
அலுவலருக்கும் இடையே நேற்றையதினம் வாக்குவாதம் ஒன்று இடம்பெற்றுள்ளது.

உரிய நடவடிக்கை 

இதனையடுத்து, தனது கடமைக்கு
இடையூறு விளைவித்ததாக கற்கோவளம் கிராம சேவகர் பருத்தித்துறை பொலிஸ்
நிலையத்தில் செய்த முறைப்பாடு காரணமாக இருவர் கைது செய்யப்பட்டுள்ளனர்.

இந்நிலையில், குறித்த கற்கோவளம் கிராம சேவகரால் பாதிக்கப்பட்டவர்கள் இன்று காலை
பத்துமணியளவில் போராட்டம் ஒன்றினை முன்னெடுத்திருந்தனர்.
 

இதன் போது, தமது வீட்டில் மழை வெள்ளம் தேங்கியதால் தாம் நலன்புரி நிலையத்தில்
தங்கியிருந்ததாகவும், அங்கு கிராம சேவகர் வேண்டுமென்று தம்மை புறக்கணித்து
தமக்கு உணவு வழங்கவில்லை என்றும் ஆர்ப்பாட்டக்காரர்கள் தெரிவித்துள்ளனர்.

இது தொடர்பில் வடமராட்சி வடக்கு பிரதேச செயலரிடம் கேட்டபோது பக்கச்சார்பற்ற
விசாரணை குழு ஒன்று அமைக்கப்பட்டு உரிய நடவடிக்கை ஏடுக்கப்படும் என்று
தெரிவித்ததுடன், ஏதாவது முறைகேடுகள் இடம்பெற்றிருந்தால் உரியவர்கள் மீது நடவடிக்கை
எடுக்கப்படும் என்றும் கூறியுள்ளார்.