இஸ்ரேலுக்கு(israel) எதிரான ஈரானிய(iran) ஏவுகணை தாக்குதலுக்கு இஸ்ரேலிய இராணுவம் “பதிலடி கொடுக்க தயாராகி வருகிறது” என்று இஸ்ரேலிய அதிகாரி ஒருவர் AFP செய்தி நிறுவனத்திடம் தெரிவித்தார்.
தனது பெயரை வெளியிட விரும்பாமல் பேசிய இஸ்ரேல் இராணுவ அதிகாரி, பதிலடியின் தன்மை அல்லது தாக்குதலுக்கான நேரம் குறித்த கூடுதல் விவரங்களை வழங்கவில்லை.
ஈரான் நடத்திய தாக்குதல்
கடந்த செவ்வாய்க்கிழமை மாலை ஹிஸ்புல்லாவுக்கு ஆதரவாக இஸ்ரேல் மீது ஈரான் கிட்டத்தட்ட 180 பாலிஸ்டிக் ஏவுகணைகளை ஏவியது. பெரும்பாலான ஏவுகணைகள் இடைமறிக்கப்பட்டன, ஆனால் ஒரு சிறிய எண்ணிக்கையானது மத்திய மற்றும் தெற்கு இஸ்ரேலைத் தாக்கியதாக இஸ்ரேலிய இராணுவம் கூறியது.
செப்டம்பர் 27 அன்று பெய்ரூட்டில் ஹிஸ்புல்லா அமைப்பின் தலைவர் ஹசன் நஸ்ரல்லா(Hassan Nasrallah) கொல்லப்பட்டது உட்பட அந்த அமைப்பை குறிவைத்து சரமாரியாக இஸ்ரேல் வான்வழித் தாக்குதல்களை நடத்தி வருகிறது.
ஈரானிய தாக்குதலுக்கான “விளைவுகள்” குறித்து இஸ்ரேல் முன்னரே எச்சரித்துள்ளது மற்றும் அமெரிக்காவுடன் சாத்தியமான பதிலடி குறித்து விவாதித்துள்ளது.
தக்க பதிலடி கொடுக்கப்படும்
இதேவேளை இஸ்ரேல் மீது ஈரானின் ஏவுகணைத் தாக்குதலுக்கு தேர்ந்தெடுக்கும் இடம் மற்றும் நேரத்தில் தக்க பதிலடி கொடுக்கப்படும் என்று இஸ்ரேலிய படைத்துறை தெரிவித்துள்ளது.
ஒரு தொலைக்காட்சியில் பேசிய இஸ்ரேலிய இராணுவ செய்தித் தொடர்பாளர் டேனியல் ஹகாரி(Daniel Hagari) செவ்வாயன்று நடத்தப்பட்ட தாக்குதலில் இரண்டு இஸ்ரேலிய விமானத் தளங்கள் தாக்கப்பட்டதை உறுதிப்படுத்தினார், ஆனால் அவை முழுமையாக செயல்படுவதாகவும் தெரிவித்தார்.
நாங்கள் அதைச் செய்வோம்
இதனிடையே “உலகில் எந்த நாடும் தனது நகரங்கள் மற்றும் குடிமக்கள் மீது இதுபோன்ற தாக்குதலை ஏற்காது, இஸ்ரேலும் அதை ஏற்றுக்கொள்ளாது என ஈரானின் ஏவுகணைத் தாக்குதலைப் பற்றி உரையாற்றிய இஸ்ரேலிய பிரதமர் பெஞ்சமின் நெதன்யாகு(Benjamin Netanyahu) தெரிவித்தார்.
“இஸ்ரேலுக்கு தன்னைத்தானே தற்காத்துக் கொள்ளவும் இந்தத் தாக்குதல்களுக்குப் பதிலடி கொடுக்கவும் கடமையும் உரிமையும் உள்ளது – நாங்கள் அவ்வாறு செய்வோம்” என்றார்.
