ஜனாதிபதி அநுரகுமார திஸாநாயக்க தலைமையிலான புதிய அரசாங்கத்தின் கிளின் சிறிலங்கா (Clean Sri Lanka) வேலைத்திட்டத்திற்கு அனைத்து உதவிகளும் வழங்கப்படுமென உலக வங்கியின் நிறைவேற்று பணிப்பாளர் பரமேஷ்வரன் ஐயர் தெரிவித்துள்ளார்.
ஜனாதிபதி அலுவலகத்தில், இன்று (04.11.2024) உலக வங்கியின் நிறைவேற்று பணிப்பாளர் பரமேஷ்வரன் ஐயருக்கும் (Parameswaran Iyer) ஜனாதிபதி அநுரகுமார திஸாநாயக்கவுக்கும் இடையிலான விசேட சந்திப்பிலேயே அவர் இதனை கூறியுள்ளார்.
இதன்போது உலக வங்கியின் ஒத்துழைப்புடன் முன்னெடுக்கப்படும் அனைத்துத் திட்டங்களும் எதிர்காலத்திலும் அவ்வண்ணமே முன்னெடுக்கப்படும் என்றும் அவர் உறுதியளித்துள்ளார்.
அரசாங்கத்தின் அபிவிருத்தி திட்டம்
இதன்போது புதிய அரசாங்கத்தின் அபிவிருத்தி திட்டம், கிராமிய வறுமையை ஒழித்தலுக்கான திட்டங்கள், பொருளாதார டிஜிட்டல் மயமாக்கல் வேலைத்திட்டத்துக்கு இணையான டிஜிட்டல் அடையாள அட்டை வழங்குவதற்கான வேலைத்திட்டம் என்பன குறித்து இருதரப்பு கலந்துரையாடல் ஒன்றும் முன்னெடுக்கப்பட்டுள்ளது.
தோட்ட மக்களின் காணி மற்றும் வீட்டுப் பிரச்சினைகள், வடக்கு கிழக்கு மக்கள் நீண்டகாலமாக முகம்கொடுத்திருக்கும் பிரச்சினைகளுக்கு தீர்வு தேடுவது குறித்தும் இதன்போது கலந்துரையாடப்பட்டுள்ளது.
