மன்னாரில் கைப்பற்றப்பட்ட அரசியல் கட்சியொன்றின் உலர் உணவு பொருட்கள்

மன்னாரில் வாக்காளர்களுக்கு அரசியல் கட்சி ஒன்றினால் வழங்குவதற்கு என கொண்டு
வரப்பட்ட ஒரு தொகுதி உலர் உணவு பொருட்கள் பொலிஸாரால் கைப்பற்றப்பட்டுள்ளதோடு மூன்று சந்தேக நபர்களும் கைது செய்யப்பட்டுள்ளனர்.

மன்னார் – யாழ் பிரதான வீதியில் வைத்து அடம்பன் பொலிஸாரினால் வாகனம் ஒன்றில்
வைத்து குறித்த உலர் உணவு பொருட்கள் மீட்கப்பட்டுள்ளன.

இதன்போது, பொலிஸார் முன்னெடுத்த விசாரணைகளில் குறித்த உலர் உணவு
பொருட்கள் அரசியல் கட்சி ஒன்றினால் வாக்காளர்களுக்கு வழங்க கொண்டு வரப்பட்டமை
தெரியவந்துள்ளது.

பொலிஸார் விசாரணை

இந்தநிலையில், குறித்த பொருட்களை பொலிஸார் அடம்பன் பொலிஸ் நிலையத்திற்கு
கொண்டு சென்றதோடு குறித்த வாகனத்தின் சாரதி, உதவியாளர் உள்ளடங்களாக வாகனத்தில்
பயணித்த மூவர் கைது செய்யப்பட்டனர்.

குறித்த வாகனத்தில் சுமார் 290 நபர்களுக்கு வழங்கக்கூடிய வகையில் தயார்
செய்யப்பட்ட 5 கிலோ அரிசி பக்கட், 2 கிலோ மா, 1 கிலோ சீனி, 20 கிராம் ரிங்சோ
பக்கட் 5 வீதம் தயார் செய்யப்பட்ட கொண்டு வரப்பட்ட நிலையில், பொலிஸாரினால்
மீட்கப்பட்டுள்ளது.

குறித்த பொருட்கள் 6 இலட்சத்து 13 ஆயிரத்து 500 ரூபாவுக்கு கொள்வனவு
செய்யப்பட்டமை தெரிய வந்துள்ளது. மேலதிக விசாரணைகளை மேற்கொண்டு வரும் அடம்பன் பொலிஸார் விசாரணைகளின் பின்னர்
சந்தேக நபர்களையும், மீட்கப்பட்ட பொருட்களையும் மன்னார் நீதிமன்றத்தில் முன்னிலைப்படுத்த உள்ளனர்.