வீதி அபிவிருத்தி அதிகார சபையுடன் இணைந்து கூகுள் மப்ஸ்(Google Maps) ஏ மற்றும் பி சாலை வரைபடங்கள் புதுப்பிக்கப்பட்டுள்ளதாக போக்குவரத்து, நெடுஞ்சாலைகள் மற்றும் நகர்ப்புற மேம்பாட்டு அமைச்சர் பிமல் ரத்நாயக்க தெரிவித்தார்.
அமைச்சர், தனது எக்ஸ் கணக்கில் ஒரு பதிவில், கூகுள் மப்ஸ் 12,000 கிலோமீட்டர் முக்கிய சாலைகளில் நிகழ்நேர தகவல்களைப் புதுப்பிக்கத் தொடங்கியுள்ளது என்று தெரிவித்துள்ளார்.
ஆறு வகையான நிலை எச்சரிக்கை
பயணிகள் தங்கள் பயணங்களை மிகவும் திறமையாக திட்டமிட உதவும் வகையில், பாதை மூடல்கள் மற்றும் கட்டுமான அறிவிப்புகள் உட்பட ஆறு வகையான நிலை எச்சரிக்கைகளை இந்த முயற்சி அறிமுகப்படுத்தியுள்ளது.
புதிய அம்சம் பயண தாமதங்களைக் குறைக்கும், பாதைத் திட்டத்தை மேம்படுத்தும் மற்றும் வீதி பயனர்களுக்கு எதிர்பாராத நெரிசலைக் குறைக்கும் என்று எதிர்பார்க்கப்படுகிறது.
பொதுமக்களுக்கு விடுக்கப்பட்ட அறிவித்தல்
சமீபத்திய புதுப்பிப்புகளுக்கு கூகுள் மப்ஸ் பயன்பாட்டைப் பார்க்கவும், பயணிக்கும்போது மேம்படுத்தப்பட்ட தரவைப் பயன்படுத்தவும் பொதுமக்களை அவர் மேலும் வலியுறுத்தினார்.
இந்த திட்டம் டிசம்பர் 31 வரை ஒரு முன்னோடித் திட்டமாக இயங்கும் என்றும் அவர் மேலும் பதிவிட்டுள்ளார்.
