அரசாங்கம் வரி வருமான இலக்குகளை அடைய எதிர்க்கட்சி யோசணை

அரசாங்கம் விரும்பிய வரி வருமான இலக்குகளை அடைய மக்களை மதுபானம் அருந்த
அனுமதிக்க வேண்டும் என்று எதிர்க்கட்சி நாடாளுமன்ற உறுப்பினர் சாமர சம்பத்
தசநாயக்க நேற்று நாடாளுமன்றத்தில் தெரிவித்துள்ளார்.

மக்களால் மதுபானம் வாங்க முடியாவிட்டால், நீங்கள் விரும்பிய வரி வருவாயை
வசூலிக்க முடியாது.

அதனால் தான் கூடுதல் சிறப்பு மதுபானமான கல் சாராயத்தின் விலையைக் குறைக்க தாம்
வலியுறுத்தி வருவதாக அவர் குறிப்பிட்டுள்ளார்

இன்று ஒரு போத்தால் கூடுதல் சிறப்பு மதுபானம் ரூ.4000 க்கும் அதிகமாக
செலவாகிறது.

அந்த மதுபானத்தின் விலை மலிவாக இருந்தால் மக்கள் மதுபானம் வாங்கி
உட்கொள்வார்கள். கூடுதல் சிறப்பு மதுபானத்தை  ரூ..2500 க்கு விற்க முடியும் என்று அவர் கூறியுள்ளார்.

அரிசி இறக்குமதி அனுமதி வர்த்தமானி

அரிசி இறக்குமதி செய்ய அனுமதிக்கும் வர்த்தமானி வெளியிடப்படுவதற்கு முன்பே,
அரசாங்கத்தின் அல்லது வர்த்தக அமைச்சரின் கூட்டாளிகளான ஐந்து தொழிலதிபர்கள்
குழு, பொன்னி சம்பா மற்றும் பால் சம்பா கொள்கலன்களை இறக்குமதி செய்ததாகவும்
அவர் தெரிவித்துள்ளார்.

இந்த வர்த்தமானி வெளியிடப்பட்ட ஒரு நாளிலேயே தென்னிந்தியாவிலிருந்து
கொள்கலன்கள் கொழும்பு துறைமுகத்தை வந்தடைந்துள்ளன என்று அவர் குறிப்பிட்டுள்ளார்.

உருளைக்கிழங்கு இறக்குமதி வரியை அதிகரிக்க அரசாங்கம் எடுத்த முடிவு தாமதமானது,
ஏனெனில் அந்த வரிவிதிப்பு உள்ளூர் விவசாயிகளுக்கு பயனளிக்காது.

“உள்ளூர்
விவசாயிகள் வரி அதிகரிப்பால் பயனடைய மாட்டார்கள், ஏனெனில் அவர்களின்
பெரும்பாலான தோட்டங்கள் சீரற்ற வானிலையால் அழிக்கப்பட்டுள்ளன,” என்றும்
நாடாளுமன்ற உறுப்பினர் சாமர சம்பத் தசநாயக்க கூறியுள்ளார்.