மன்னார் கிராம பகுதியொன்றில் வளர்ப்பு நாய்கள் மர்மமான முறையில் உயிரிழப்பு

மன்னார் (Mannar) உப்புக்குளம் நளவன் வாடி பகுதியில் வீட்டு வளர்ப்பு நாய்கள் தொடர்ச்சியாக மர்மமான முறையில் உயிரிழந்து வருவதாக அப்பகுதி மக்கள்
தெரிவித்துள்ளனர்.

இச்சம்பவமானது கடந்த சில தினங்களாக நடைபெற்று வருவதாக அப்பகுதி மக்கள் கவலை வெளியிட்டுள்ளனர்.

மிகவும் ஆரோக்கியமாக அனைத்து தடுப்பூசிகளும் போடப்பட்டு கிரமமான முறையில்
பராமரிக்கப்பட்டு வந்த நாய்கள் திடீரென இறப்பது தங்களுக்கு வேதனையளிப்பதாகவும் அவர்கள் கூறியுள்ளனர்.

துரித நடவடிக்கைகள்

குறித்த நாய்கள் வீட்டில் இருந்து வெளியில் சென்ற நிலையிலே இவ்வாறான சம்பவம்
இடம்பெற்று வருகின்றது. 

இதுவரை 8 நாய்கள் இவ்வாறு உயிரிழந்த நிலையில் மேலும் மூன்று நாய்களின் நிலை
கவலைக்கிடமாக இருப்பதாகவும் குறித்த நாய்களுக்கு அப்பகுதியில் யாரோ நஞ்சு
கலந்த உணவை வழங்கியிருக்கலாம் எனவும் சந்தேகிக்கப்படுகின்றது.

இந்நிலையில், நாய்கள் மாத்திரமன்றி காகங்கள் மற்றும் கோழிகளும்
உயிரிழந்துள்ளதாகத் தெரியவருகின்றது. 

இது குறித்து உரிய அதிகாரிகள் துரித நடவடிக்கைகளை மேற்கொள்ள
வேண்டும் என நாய்களின் உரிமையாளர்கள் கோரிக்கை விடுத்துள்ளனர்.