அரசாங்கத்தினால் நிர்ணயிக்கப்பட்ட நெல்லுக்கான விலை: விவசாயிகள் விடுத்துள்ள கோரிக்கை

தற்பொழுது அரசாங்கத்தினால் நிர்ணயிக்கப்பட்ட நெல்லுக்கான விலை தமக்கு போதுமானதாக அமையவில்லை என விவசாயிகள்
தெரிவித்துள்ளனர்.

கிளிநொச்சி மாவட்டத்தின் பெரும்போக அறுவடை நிறைவடையும் நிலையில்
அரசாங்கத்தினால் நெல்லுக்கான விலை நிர்ணயிக்கப்பட்டுள்ளது.

அந்த வகையில்
சிவப்பு நெல்லுக்கு 120 ரூபாவாகவும், சம்பா நெல்லுக்கு 125 ரூபாவாகவும், கீரிச்சம்பா நெல்லுக்கான விலை 132 ரூபாவாகவும் அரசாங்கத்தினால் நிர்ணயிக்கப்பட்டுள்ளது.

நெல்லுக்கான விலை 

விவசாயிகள் கருத்து தெரிவிக்கையில், தற்பொழுது கிளிநொச்சி மாவட்டத்தில் அறுவடை நிறைவடைந்து
வரும் நிலையில் நெல்லுக்கான விலை அறிவிக்கப்பட்டிருந்த போதிலும் தற்பொழுது மழை
வெள்ளத்தில் ஈரமான நெல்லினையே 8000 ரூபாய்க்கு விற்பனை செய்யக்கூடியதாக
வயல்களிலே வந்து தனியார் கொள்வனவு செய்கின்றனர்.

அரசாங்கத்தினால்
நிர்ணயிக்கப்பட்ட விலைக்கு எம்மால் கொண்டு சென்று அங்கு வழங்க வேண்டிய நிலை
உள்ளது.

விவசாயிகளாகிய எமக்கு இம்முறை பாரிய மழை வெள்ளம் மற்றும் நோய் தாக்கம்
காரணமாக அழிவை ஏற்படுத்தி உள்ளது.

கோரிக்கை

இந்நிலையில் பத்தாயிரம் ரூபாய்க்கு கூட
நெல்லை விற்பனை செய்தாலும் எமது நஷ்ட ஈட்டினை மீள பெற முடியாத நிலையில்
விவசாயிகள் ஆகிய நாம் பெரும் நஷ்டத்தில் தள்ளப்பட்டுள்ளோம்.

அத்துடன், சந்தையில் அரிசியை கொள்வனவு செய்து பயன்படுத்துபவர்கள்
பாதிக்கப்படாத வகையில் 140 ரூபாய் அல்லது 130 ரூபாய் அரசாங்கத்தினால்
நிர்ணயிக்கப்பட்டிருந்தால் ஓரளவு போதியதாக அமைந்திருக்கும் என விவசாயிகள்
தெரிவித்துள்ளனர்.

நேற்றையதினம் (5) அரசாங்கத்தினால் நெல் களஞ்சிய
சாலைகள் நெல் கொள்வனவுக்காக திறந்து வைக்கப்பட்டுள்ளமை குறிப்பிடத்தக்கது.