வரிய மக்கள் யார் என்பதையே இனங்காணாத அரசாங்கம்: சஜித் சாடல்!

29/08/2024

வறுமையை ஒழிப்பதாக அரசாங்கம் கூறியபோதும் வரிய மக்கள் யார் என்பதை இனம் கண்டு
கொள்ளவில்லை என எதிர்க்கட்சித் தலைவர் சஜித் பிரேமதாச (Sajith Premadasa) தெரிவித்துள்ளார்.

கொழும்பு (Colombo) சினமன் லேக்சைட் விருந்தகத்தில் ‘சஜித் உடன்
சமுர்த்தி சக்தி’ என்ற விசேட மாநாடொன்றில் இன்று(29) கலந்துக்கொண்டு உரையாற்றும் போதே அவர் இதனைக் குறிப்பிட்டுள்ளார்.

அவர் தொடர்ந்து தெரிவிக்கையில், “அதனை சரியாக அறிந்து கொள்வதற்கு சனத் தொகை மற்றும்
புள்ளிவிபரவியல் கணிப்பீட்டு திணைக்களத்தினாலும் அதனை அறிந்து கொள்ள முடியாமல்
போயுள்ளதாகவும் சுட்டிக்காட்டியுள்ளார்.

ஐக்கிய மக்கள் சக்தி

இதனை சரியாக அறிந்து கொள்ளாமல் அஸ்வெசும (ASWESUMA) வேலைத்திட்டத்தை
முன்னெடுத்தமையால், 8 இலட்சம் பேருக்கான நிவாரணம் இல்லாமல் போயிருக்கின்றது.
இந்த வேலை திட்டத்தை முன்னெடுப்பதற்கு முன்பு அறிவியல் ரீதியாக வறுமைக்கோடு
குறித்து கணக்கிடப்பட வேண்டும்.

இந்த வேலைத்திட்டங்களை முன்னெடுப்பதற்கு அரசாங்கத்திடம் உறுதியான செயற்பாடுகள்
இல்லை என்றாலும், ஐக்கிய மக்கள் சக்தி (SJB) முன்னெடுக்கும் வேலைத்திட்டங்களில்
பெரிய தொகையொன்று வழங்கப்பட்டு, அதனைப் பயன்படுத்தி வறுமையிலிருந்து மீண்டு
வர வேண்டும்.

தொடர்ந்தும் இந்த நிவாரணங்கள் கிடைக்கப் பெறாது. வங்கரோத்தடைந்த
நாட்டில் வறியவர்கள் அதிகமாக இருப்பார்கள் என்றால் மீண்டு வர முடியாது. எனவே
வறுமையை இல்லாது ஒழிக்க வேண்டும் என்று எதிர்க்கட்சித் தலைவர் தெரிவித்தார்.