இலங்கைக்கு விஜயம் மேற்கொள்ளும் தனது நாட்டு பிரஜைகளிற்கு விதிக்கப்பட்டுள்ள கட்டுப்பாடுகள் குறித்து பாகிஸ்தான் (Pakistan) அதிருப்தி வெளியிட்டுள்ளது.
இலங்கை அரசாங்கம் 38 நாடுகளின் பிரஜைகள் விசா இல்லாமல் இலங்கைக்கு பயணம் மேற்கொள்ளலாம் என அண்மையில் அறிவித்துள்ளது.
எனினும் குறித்த பட்டியலில் தனது நாடு இடம்பெறாமை குறித்து பாகிஸ்தான் சீற்றமடைந்துள்ளதாக தகவல்கள் வெளியாகியுள்ளன.
வெளிவிவகார அமைச்சருக்கு தெரிவிப்பு
இந்த நிலையில் பாகிஸ்தானிற்கான இலங்கை தூதுவர் ரவீந்திர விஜேகுணவர்தன (Ravindra Wijegunawardena), இதனை வெளிவிவகார அமைச்சர் அலி சப்ரியின் (Ali Sabry) கவனத்திற்கு கொண்டுவந்துள்ளதுடன் பாகிஸ்தானையும் இந்த பட்டியலில் இணைத்துக்கொள்ளுமாறு கேட்டுக்கொண்டுள்ளார் என குறிப்பிடப்பட்டுள்ளது.
இதேவேளை பாகிஸ்தான் பிரஜைகளிற்கான விசா வழங்கும் நடைமுறை குறித்து அதிருப்தி வெளியிட்டுள்ள இலங்கைக்கான பாகிஸ்தான் தூதுவர் மேஜர் ஜெனரல் உல் அஜீஸ் இந்தியா உட்பட ஏனைய நாடுகளுடன் ஒப்பிடுகையில் இதனை மாற்றாந்தாய் மனப்பான்மை என வர்ணித்துள்ளார்.
மேலும் பாகிஸ்தான் பிரஜைகள் இலங்கைக்கு சுமூகமான விதத்தில் பயணம் செய்வதை உறுதி செய்வதற்காக தற்போதைய நடைமுறைய உடனடியாக மாற்றவேண்டும் என அவர் வேண்டுகோள் விடுத்துள்ளமை குறிப்பிடத்தக்கது.
