வடக்கு மாகாண விளையாட்டுத் திணைக்களத்தால் ஏற்பாடு செய்யப்பட்ட 18ஆவது வடக்கு மாகாண விளையாட்டு விழா இரண்டு நாட்களாக யாழ்ப்பாணம் துரையப்பா விளையாட்டரங்கில் இடம்பெற்று, நேற்று (20.09.2026) ஞாயிற்றுக்கிழமை வெற்றிகரமாக நிறைவடைந்தது.
இவ்விளையாட்டு விழாவின் இறுதி நாள் நிகழ்வில் கடற்றொழில், நீரியல் மற்றும் கடல்வளங்கள் கௌரவ அமைச்சர் இ.சந்திரசேகர் அவர்கள் பிரதம விருந்தினராகக் கலந்து கொண்டு வெற்றி பெற்ற வீர வீராங்கனைகள் மற்றும் அணிகளுக்கான பரிசில்களை வழங்கி வைத்தார்.
இவ்விளையாட்டு விழாவில் வடக்கு மாகாணத்தின் ஐந்து மாவட்டங்களையும் சேர்ந்த வீர வீராங்கனைகள் பல்வேறு போட்டிகளில் பங்கேற்று தமது திறமைகளை வெளிப்படுத்தினர்.
போட்டிகளின் ஒட்டுமொத்த பெறுபேறுகளின் அடிப்படையில் யாழ்ப்பாணம் மாவட்டம் முதலிடத்தையும், வவுனியா மாவட்டம் இரண்டாம் இடத்தையும், மன்னார் மாவட்டம் மூன்றாம் இடத்தையும் பெற்றுக்கொண்டன.
இந்நிகழ்வில் வடக்கு மாகாண பிரதம செயலாளர் திருமதி தனுஜா முருகேசன், வடக்கு மாகாண கல்வி அமைச்சின் செயலாளர் ம.பற்றிக் டிறஞ்சன் மற்றும் வடக்கு மாகாண விளையாட்டுத் திணைக்களத்தின் பணிப்பாளர் க.ஏகாந்தன் ஆகியோரும் கலந்து கொண்டனர்.