கிளிநொச்சி மாவட்ட மீனவர்கள் சந்திக்கும் அடுக்கடுக்கான வாழ்வாதாரச் சிக்கல்களுக்கு முற்றுப்புள்ளி வைக்கும் நோக்கில், மாவட்ட கடற்றொழில் ஒருங்கிணைப்புக் குழுக் கூட்டம் நேற்று கிளிநொச்சி மாவட்ட செயலகத்தில் நடைபெற்றது. கடற்றொழில், நீரியல் மற்றும் கடல்வளங்கள் அமைச்சர் இராமலிங்கம் சந்திரசேகர் தலைமையில் நடைபெற்ற இக்கூட்டத்தில் நாடாளுமன்ற உறுப்பினர்களான கஜேந்திரகுமார் பொன்னம்பலம், சிவஞானம் சிறீதரன் உட்பட உயர் அரசு அதிகாரிகளும், மீனவ சங்கப் பிரதிநிதிகளும் பங்கேற்றனர்.
யாழ்ப்பாணம், மன்னார் மற்றும் இந்திய இழுவைப்படகுகளின் அத்துமீறல்களால் வாழ்வாதாரம் கடுமையாகப் பாதிக்கப்படுவதாக மீனவர்கள் முன்வைத்த புகாருக்குப் பதிலளித்த அமைச்சர், “இந்திய அரசுடன் பேச்சுவார்த்தை நடத்துவதற்கான அழைப்பு கிடைத்துள்ளது. வரும் செப்டெம்பர் அல்லது ஒக்டோபர் மாதத் தொடக்கத்தில் இதற்கான தீர்க்கமான பேச்சுவார்த்தை நடைபெறும். மேலும், தடை செய்யப்பட்ட மீன்பிடி முறைகளில் ஈடுபடுவோர் மீது கடும் சட்ட நடவடிக்கை பாயும்” என எச்சரித்தார்.
கூட்டத்தில் எட்டப்பட்ட முக்கிய முடிவுகள்:
சீன நிதியுதவி வீட்டுத்திட்டச் சிக்கல்: தட்டுவன்கொட்டியில் கட்டப்பட்டு வரும் 15 வீடுகளின் பணிகள், வனஜீவராசிகள் திணைக்களத்தின் காணிப் பிரச்சினை காரணமாக முடங்கியுள்ளது. இதுகுறித்து உடனடியாக சம்பந்தப்பட்ட அமைச்சுகளுடன் பேசி தீர்வு காண உறுதியளிக்கப்பட்டுள்ளது.
அன்புபுரம் – கௌதாரிமுனை கடற்பரப்பில் கம்பி வலை (Trap Net) மீன்பிடிக்க அனுமதிப்பது தொடர்பாக சாத்தியவள அறிக்கையை வழங்குமாறு ‘நாரா’ (NARA) நிறுவனத்திற்கு உத்தரவிடப்பட்டுள்ளது.
அன்புபுரம், நாச்சிக்குடா, கிராஞ்சி உள்ளிட்ட கடலோரப் பகுதிகளில் உள்ள மீன்பிடி இறங்குதுறைகளை ஆழப்படுத்தும் பணிகள் விரைவுபடுத்தப்படும்.
மீனவ சமூகத்தின் வாழ்வாதாரத்தைப் பாதுகாத்து, அவர்களின் அடிப்படைப் பிரச்சினைகளுக்கு நடைமுறைச் சாத்தியமான நிரந்தரத் தீர்வுகளை அரசு வழங்கும் என அமைச்சர் கூட்டத்தில் உறுதியளித்தார்.