இன்று காலை 6.00 மணியுடன் நிறைவடைந்த 24 மணிநேர காலப்பகுதியில் நுவரெலியா மாவட்டத்தில் 118.80 மில்லிமீட்டர் (மி.மீ) அளவில் மழைவீழ்ச்சி பதிவாகியுள்ளதாக அனர்த்த முகாமைத்துவ நிலையம் தெரிவித்துள்ளது.
நுவரெலியா மாவட்டத்தின் கொத்மலை பிரதேச செயலாளர் பிரிவுக்குட்பட்ட தெலிஸ்ஸகல, ஹுனுகல் ஓயா ஆகிய பகுதிகளிலேயே இந்த 118.80 மில்லிமீட்டர் அளவிலான மழைவீழ்ச்சி பதிவாகியுள்ளதாக அந்த நிலையம் குறிப்பிட்டுள்ளது.
இதற்கு மேலதிகமாக, நுவரெலியாவின் வட்டவளை பகுதியில் (82 மி.மீ), கேகாலையில் (70 மி.மீ) மற்றும் இரத்தினபுரியின் எரத்த பகுதியில் (62 மி.மீ) ஆகிய இடங்களிலும் அதிக மழைவீழ்ச்சி பதிவாகியிருந்தது.
இந்நிலையில் கினிகத்தேன பொலிஸ் பிரிவுக்குட்பட்ட தெஹிகஸ்தென கிராம அலுவலர் கோட்டத்தில் ஏற்பட்ட நிலச்சரிவின் காரணமாக, எல்லா–உடா செல்லும் தெஹிகஸ்தென பிரதான வீதி மண் திட்டுகளால் முற்றிலுமாக மூடப்பட்டுள்ளது.
இதன் காரணமாக எல்லா வரை பேருந்துகள் செல்ல முடியாத நிலை உருவாகியுள்ளதாக கினிகத்தேன பொலிஸார் தெரிவித்துள்ளனர். தற்போது பேருந்து சேவைகள் மாற்றுப் பாதைகளுக்கு திருப்பி விடப்பட்டு வருகின்றன.
கடந்த டித்வா பருவ காலத்திலும் இப்பகுதி இதேபோன்று நிலச்சரிவுகளால் பாதிக்கப்பட்டிருந்தது குறிப்பிடத்தக்கது.
இந்நிலையில், அம்பகமுவ பிரதேச செயலாளர் சம்பவ இடத்திற்கு நேரில் சென்று நிலைமையை பார்வையிட்டுள்ளார். சாலையில் ஏற்பட்ட மண் திட்டுகளை அகற்றுவதற்கான நடவடிக்கைகள் தற்போது முன்னெடுக்கப்பட்டு வருகின்றன.
மண் திட்டுகள் முழுமையாக அகற்றப்பட்ட பின்னர் வழமைபோல் பேருந்து சேவைகள் மீண்டும் இடம்பெறும் என அதிகாரிகள் தெரிவித்துள்ளனர்.
