வவுனியாவில்(Vavuniya) வெள்ளத்தினால் பாதிக்கப்பட்டுள்ளவர்களுக்கு தேவையான அத்தியாவசிய உலர் உணவுப் பொருட்களை, தொடர்ச்சியாக ஒருவார காலத்துக்கு வழங்க நடவடிக்கை எடுக்குமாறும் ரிஷாட் பதியுதீன் (Rishad Bathiudeen)கோரிக்கை விடுத்துள்ளார்.
வவுனியா மாவட்ட செயலகத்தில் இன்று (29) காலை, இடம்பெற்ற
ஒருங்கிணைப்பு குழுக் கூட்டத்திலேயே அவர் இதனை குறிப்பிட்டுள்ளார்.
குறித்த கூட்டத்தில் அவர் மேலும் தெரிவித்துள்ளதாவது, “தொழிலுக்குச் செல்ல முடியாமல் இருப்பவர்கள் மற்றும் வெளியேற முடியாமல் குடியிருப்புக்களுக்குள் தங்கியிருப்பவர்களுக்கு சரியான முறையில் உணவுகள் வழங்கப்படுவதில்லை.
வெள்ளத்தில் பாதிக்கப்பட்டவர்கள்
அவ்வாறு வெள்ள நிலைமையினால் பாதிக்கப்பட்டுள்ளவர்களை அடையாளங்கண்டு தேவையான அத்தியாவசிய உலர் உணவுப் பொருட்களை, அரச சார்பற்ற நிறுவனங்களின் உதவியுடன், தொடர்ச்சியாக ஒருவார காலத்துக்கு வழங்க நடவடிக்கை எடுக்க வேண்டும்.
அத்துடன், வெள்ளப்பாதிப்பினால் இந்த முறை உயர்தரப் பரீட்சையில் தோற்றும் மாணவர்கள் பெரிதும் பாதிக்கப்பட்டுள்ளதால், அவர்கள் தொடர்பில் விஷேட கவனம் செலுத்தப்பட வேண்டும்.
இதேவேளை, பாதிக்கப்பட்டுள்ள மக்களுக்குத் தேவையான அவசர உதவிகளை துரித கதியில் முன்னெடுக்க வேண்டும்.” என அவர் வேண்டுகோள் விடுத்துள்ளார்.
மேலும், கூட்டுறவு அபிவிருத்தி பிரதி அமைச்சர் உபாலி சமரசிங்ஹ தலைமையில் நடைபெற்ற இக்கூட்டத்தில், அகில இலங்கை மக்கள் காங்கிரஸ் தலைவரும் நாடாளுமன்ற உறுப்பினருமான ரிஷாட் பதியுதீன் மற்றும், வன்னி மாவட்ட நாடாளுமன்ற உறுப்பினர்கள், அரசாங்க அதிபர் சரத்சந்திர உட்பட பிரதேச செயலாளர்கள், அனர்த்த முகாமைத்துவ அதிகாரிகள், பாதுகாப்புப் துறை அதிகாரிககள் எனப் பலரும் கலந்துகொண்டுள்ளனர்.