பாதாள உலக நபர்கள் மற்றும் போதைப்பொருள் கடத்தல்காரர்களை ஆதரிக்கும் அரசியல்வாதிகள் ஏற்கனவே அடையாளம் காணப்பட்டுள்ளதாகவும், அவர்கள் விரைவில் சட்ட நடவடிக்கையை எதிர்கொள்வார்கள் என்றும் புதிதாக நியமிக்கப்பட்ட காவல்துறை மா அதிபர் பிரியந்த வீரசூரிய(Priyantha Weerasuriya), தெரிவித்தார்.
இன்று(14) அதிகாரபூர்வமாக கடமைகளை ஏற்றுக்கொண்ட பின்னர் ஊடகங்களுக்கு கருத்து தெரிவித்த காவல்துறை மா அதிபர் வீரசூரிய, நாட்டில் அதிகரித்து வரும் குற்றங்கள் மற்றும் போதைப்பொருள் தொடர்பான நடவடிக்கைகளை திறம்பட எதிர்த்துப் போராடுவதற்கு தற்போதுள்ள சட்டங்களை வலுப்படுத்த வேண்டிய அவசியம் உள்ளது என்றார்.
தற்போதைய சட்ட கட்டமைப்பில் உள்ள பலவீனம்
தற்போதைய சட்ட கட்டமைப்பு தொடர்ச்சியான சோதனைகள் மற்றும் அமுல்படுத்துவதற்கான நடவடிக்கைகளை ஆதரிக்க போதுமானதாக இல்லை என்று அவர் கூறினார்.
குற்றம் மற்றும் போதைப்பொருள் வலையமைப்புகளைத் தடுப்பதற்கான சிறப்பு நடவடிக்கைகள் தற்போதுள்ள சட்டங்களின் கீழ் திறம்பட தொடர முடியாது என்று ஜனாதிபதி, நீதி அமைச்சர் மற்றும் பொது பாதுகாப்பு அமைச்சர் ஆகியோருக்குத் தெரிவிக்கப்பட்டுள்ளது,” என்று அவர் தெரிவித்தார். மேலும் இந்த இடைவெளிகளை நிவர்த்தி செய்ய புதிய சட்டம் வரைவு செய்யப்பட்டு வருவதாகவும் குறிப்பிட்டார்.
“குற்றவியல் மற்றும் ஊழல் நடவடிக்கைகளில் தொடர்ந்து ஈடுபடும் நபர்களைக் கையாள்வதற்கான சட்டங்களை நாங்கள் உருவாக்கி வருகிறோம். சர்வதேச சமூகம் அதன் முழு ஆதரவையும் வழங்கியுள்ளது, மேலும் ஒத்துழைப்பை மேம்படுத்தவும் அவர்களின் உதவியைப் பயன்படுத்தவும் நாங்கள் நடவடிக்கை எடுத்து வருகிறோம்,” என்று அவர் மேலும் தெரிவித்தார்.
சமீபத்திய துப்பாக்கிச் சூடு சம்பவங்கள்
அதிகரித்து வரும் வன்முறை சம்பவங்கள் குறித்தும் காவல்துறை மா அதிபர் வீரசூரிய உரையாற்றினார். சமீபத்திய துப்பாக்கிச் சூடு சம்பவங்கள் உட்பட பல குற்றங்கள், வெளிநாடுகளில் இருந்து செயல்படும் தனிநபர்களால் உள்ளூர் கூட்டாளிகள் மூலம் திட்டமிடப்படுகின்றன என்று அவர் கூறினார்.
இந்த குற்றவியல் வலையமைப்புகளில் ஈடுபட்டுள்ள சில நபர்களில் ஆயுதப்படைகளில் இருந்து தப்பியோடியவர்கள் மற்றும் காவல்துறை உறுப்பினர்கள் கூட அடங்குவர் என்பதை அவர் மேலும் வெளிப்படுத்தினார்.
“காவல்துறை சேவையை முழுமையாக சுத்திகரிப்பதில் தொடங்கி, பரந்த சமூக கவனம் செலுத்துவதன் மூலம் இந்தப் பிரச்சினையைத் தீர்க்க நாங்கள் நடவடிக்கை எடுத்து வருகிறோம்,” என்று அவர் கூறினார்.
சட்டவிரோத ஆயுதங்களின் புழக்கம்
சட்டவிரோத ஆயுதங்களின் புழக்கம் குறித்து கருத்து தெரிவித்த அவர், தற்போது பொதுமக்களிடம் கணிசமான எண்ணிக்கையிலான துப்பாக்கிகள் உள்ளன என்று தெரிவித்தார்.
“இதில் முப்படைகளின் ஆயுதங்கள், முன்னாள் விடுதலைப் புலிகளின் ஆயுதங்கள், திருடப்பட்ட துப்பாக்கிகள் மற்றும் காவல் துறையுடன் தொடர்புடையும் அடங்கும். இது தொடர்பில் விசாரணைகள் தொடர்ந்து நடைபெற்று வருகின்றன,” என்று அவர் விளக்கினார்.
குற்றவியல் அல்லது போதைப்பொருள் தொடர்பான நடவடிக்கைகளில் ஈடுபட்டதாகக் கண்டறியப்பட்ட காவல்துறை அதிகாரிகள் மீது கடுமையான ஒழுக்காற்று மற்றும் சட்ட நடவடிக்கை எடுக்கப்படும் என்று அவர் வலியுறுத்தினார்.
“குற்றம் நிரூபிக்கப்பட்ட அதிகாரிகள் பணி இடைநீக்கம் செய்யப்படுவார்கள்” என்று காவல்துறை மா அதிபர் வலியுறுத்தினார்.