அரசாங்கம் இன்று ‘தர்மாதிகரணம்’ ஒன்று தேவை என்று கூறினாலும், கடந்த 2016 ஆம் ஆண்டு தாம் நீதி மற்றும் புத்தசாசன அமைச்சராக இருந்தபோதே இதற்குத் தேவையான ‘சங்காதிகரண’ சட்டமூலத்தைக் கொண்டு வந்ததாக ஸ்ரீலங்கா சுதந்திரக் கட்சியின் சிரேஷ்ட உபதலைவரும், ஜனாதிபதி சட்டத்தரணியுமான விஜயதாச ராஜபக்ஷ தெரிவித்துள்ளார்.
கொழும்பிலுள்ள ஸ்ரீலங்கா சுதந்திர கட்சியின் தலைமையகத்தில் நடைபெற்ற ஊடகவியலாளர் சந்திப்பொன்றில் கலந்துகொண்டு கருத்து வெளியிட்ட அவர், அச்சட்டம் காரணமாகவே இன்று விகாரைகளும் பௌத்த சின்னங்களும் ஓரளவு பாதுகாக்கப்பட்டுள்ளதாகவும், இல்லையெனில் அவை எப்போதோ விற்கப்பட்டிருக்கும் என்றும் சுட்டிக்காட்டினார்.
அந்தச் சட்டத்தின் கீழ் பொதுமக்களுக்கு எந்த அதிகாரமும் இல்லை எனக் குறிப்பிட்ட அவர், ஏதேனும் தவறுகள் நடக்கும் பட்சத்தில், அந்தந்த நிகாயாக்களின் தலைமைகளுக்கு சட்டப்படி உத்தரவுகளைப் பிறப்பிக்கும் அதிகாரம் இன்றும் உள்ள போதிலும், அன்று இரண்டு மூன்று தேரர்களின் எதிர்ப்புக் காரணமாக இந்தச் சட்டத்தை முழுமையாக நிறைவேற்ற முடியாமல் போனதால், இன்று அதனை நடைமுறைப்படுத்துவதற்கான முழுமையான அதிகாரம் இல்லாமல் போயுள்ளதாகக் கவலை வெளியிட்டார்.
அரசாங்கத்தின் தற்போதைய வரைவிலக்கணத்தின்படி மதம் என்பது ஒரு பழங்குடித் தனமான விடயமாகவே பார்க்கப்படுவதாக விமர்சித்த அவர், அவ்வாறான ஒரு அரசாங்கம் எவ்வாறு சங்காதிகரணத்தைக் கொண்டுவரும் எனக் கேள்வி எழுப்பினார். தாம் ஒரு தசாப்தத்திற்கு முன்னர் கொண்டு வந்த சட்டம் அன்று நிறைவேற்றப்பட்டிருந்தால், இன்று பௌத்த சாசனத்தையோ அல்லது தேரர்களையோ எவரும் தூற்றவும், சாசனம் சீரழியவும் வாய்ப்பிருந்திருக்காது என்றும் அவர் குறிப்பிட்டார்.
தற்போது நீதித்துறையில் நான்கு நீதிபதி பதவிகள் நீண்டகாலமாக வெற்றிடமாக உள்ளதோடு, சில நீதிபதிகள் இந்த வெற்றிடங்கள் நிரப்பப்படாத நிலையிலேயே ஓய்வு பெற்றும் சென்றுள்ள நிலையில் மக்களுக்கு எவ்வாறு நீதி கிடைக்கும் என வினவிய ஜனாதிபதி சட்டத்தரணி விஜயதாச ராஜபக்ஷ, அரசியலமைப்பைப் பாதுகாப்பதாக உறுதியளித்துவிட்டு, அதனை மீறும் வகையில் நீதித்துறை வெற்றிடங்களை நிரப்பாமல் அலட்சியம் காட்டும் ஜனாதிபதிக்கு எதிராக பழிசுமத்த முடியும் என்றும் எச்சரித்தார்.
நிர்வாகத்துறையும் அரசியலமைப்பும் நீதித்துறை வெற்றிடங்களை நிரப்பாதபோது, இவர்கள் எவ்வாறு சங்காதிகரணத்தை அமைப்பார்கள் என்றும் அவர் கேள்வி எழுப்பினார். நமது வாழ்நாளில் மிக மோசமான பொருளாதாரக் காலத்தை 2022 இல் எதிர்கொண்டதாகக் குறிப்பிட்ட அவர், அன்று முழு அதிகாரத்துடன் இருந்த அரசாங்கம் பொருளாதாரத்தை முகாமைத்துவம் செய்ய முடியாமல் வீட்டுக்குச் சென்ற பின்னர், நாடாளுமன்றத்தில் ஒரேயொரு ஆசனத்தைக் கொண்டிருந்த ரணில் விக்ரமசிங்க, அரசாங்கத்தின் எஞ்சியிருந்த சில உறுப்பினர்களின் ஆதரவோடு ஆட்சிக்கு வந்ததாகத் தெரிவித்தார்.
அன்று 6.4 மில்லியன் டொலராக இருந்த பொருளாதாரத்தை நாம் கட்டியெழுப்பியதோடு, 2028 ஆம் ஆண்டளவில் கடனை மறுசெலுத்துகை செய்ய வேண்டுமாயின், அதனை 15 மில்லியன் டொலராக உயர்த்த வேண்டும் என்ற திட்டம் தங்களிடம் இருந்ததாகக் கூறினார். எனினும், தற்போது 500 மில்லியன் டொலர் எல்லைக்குள் வாகனங்களை இறக்குமதி செய்ய அனுமதி வழங்கப்பட்டுள்ள நிலையில், அவ்வாறு இறக்குமதி செய்யப்பட்ட வாகனங்கள் நாட்டுக்கு அவசியமானவையா எனவும், அவை அனைத்தும் தற்போது விற்பனை நிலையங்களிலேயே தேங்கிக் கிடப்பதாகவும் அவர் சுட்டிக்காட்டினார்.
சர்வதேச நாணய நிதியம் தங்கியிருக்கும் வீடுகளுக்கு வரி விதிக்குமாறு கோரிய போதிலும், மக்களுக்கு மேலும் சுமையளிக்கக் கூடாது என்பதால் தாம் அதனைச் செய்யவில்லை என்றும் அவர் வெளிப்படுத்தினார்.
மத்திய வங்கி சுயாதீனமாக இயங்க வேண்டும் என்பதில் மாற்றுக் கருத்து இல்லை என்றாலும், முறையான முகாமைத்துவம் இல்லாததால் அது நம் நாட்டுக்குப் பொருத்தமற்றதாகிவிட்டது எனக் குறிப்பிட்ட அவர், உதாரணமாக ஹேக்கர்கள் பணத்தைக் கொள்ளையடித்த சம்பவத்தில், பணத்தைச் செலுத்துவதற்கு 10 சந்தர்ப்பங்கள் இருந்தபோதும், இருமுறை செலுத்திய பின்னர் முறையான உத்தியோகபூர்வ அறிக்கை கிடைக்காத பட்சத்தில் ஏன் மீண்டும் பணம் செலுத்தப்பட்டது எனக் கேள்வி எழுப்பினார்.
தற்போது நாட்டின் பொருளாதாரம் மிக மோசமான திசையை நோக்கிச் சென்று கொண்டிருப்பதாக எச்சரித்த அவர், வட்டி வீதக் கொள்கை 7.7 ஆக இருந்தபோது அதனை மேலும் உயர்த்தியதன் மூலம் இந்தத் தீர்வை எட்ட முடியுமா எனவும், வட்டி வீதம் அதிகரிக்கும் போது கைத்தொழில்துறையினர் கடன் பெற மாட்டார்கள் என்பதால் பொருளாதாரம் முடங்கும் என்றும் தெரிவித்தார்.
அரசு வங்கிகளின் இலாபம் 10 பில்லியன் டொலராகவும், தனியார் வங்கிகளின் இலாபம் 4 முதல் 5 பில்லியனாகவும் இருந்த நிலையில், கடந்த ஐந்து வருடங்களில் இந்த வங்கிகளின் இலாபம் ஐந்து மடங்காக அதிகரித்துள்ளதாகக் குறிப்பிட்ட அவர், தற்போது உள்நாட்டு இறைவரித் திணைக்களத்திலும், வங்கிகளிலும் பணம் குவிந்து கிடக்கிறதே தவிர முதலீடுகள் செய்யப்படுவதில்லை என்றார்.
உலகின் எந்தவொரு நாடும் பொக்கிஷங்களில் பணத்தைப் பூட்டி வைப்பதில்லை எனவும், நாடு வளர்ச்சியடைய வேண்டுமாயின் அந்தப் பணம் சந்தைக்கு வர வேண்டும் என்றும் வலியுறுத்திய அவர், இவ்வளவு பணம் உள்நாட்டில் இருக்கும்போது, ஏன் சர்வதேச நாணய நிதியத்திடம் இருந்து 1,900 மில்லியன் டொலர் கடனைப் பெற்று அதற்கு வீணாக வட்டி செலுத்த வேண்டும் எனக் கேள்வி எழுப்பினார்.
நமது நாடு வீழ்ச்சியடைவதையே வெளிநாடுகள் விரும்புவதாகவும், ‘அரகலய போராட்ட’ காலம் தொட்டே இலங்கையை வீழ்த்துவதற்கு வெளிநாட்டுச் சக்திகள் திட்டமிட்டுச் செயற்பட்டு வருவதாகவும் அவர் குற்றம் சாட்டினார்.
கோட்டாபய ராஜபக்ஷவை மீண்டும் அரசியலுக்குக் கொண்டு வரும் எண்ணம் உள்ளதா என ஊடகவியலாளர்கள் எழுப்பிய கேள்விக்கு பதிலளித்த அவர், அவரை மீண்டும் ஆட்சிக்குக் கொண்டு வருவதற்கு எந்தவொரு வாய்ப்பும் இல்லை என்று திட்டவட்டமாகத் தெரிவித்தார். அவர் பதவியேற்று 24 மணித்தியாலங்களிலேயே, அவர் நியமித்த ஜனாதிபதி செயலாளர் மற்றும் மத்திய வங்கி ஆளுநரின் செயற்பாடுகளைக் கண்டு இந்த நாடு வீழ்ச்சியடையும் என்பதை நாங்கள் அறிந்துகொண்டதாகக் குறிப்பிட்ட அவர், கோட்டாபய ராஜபக்ஷவுக்கு எந்தவொரு தொலைநோக்குப் பார்வையும் இருக்கவில்லை என்றும், அருகில் இருந்த சில தகுதியற்றவர்களின் ஆலோசனையைக் கேட்டு நாட்டின் வரி வருமானத்தைக் குறைத்தமையினாலேயே பொருளாதாரம் முற்றாக சீரழிந்தது என்றும் கூறினார்.
அத்துடன், இரசாயன உரப் பிரச்சினையால் நாட்டின் விவசாயத்துறை வீழ்ச்சியடைந்து, வெளிநாடுகளில் இருந்து அத்தியாவசிய உணவுகளை இறக்குமதி செய்ய வேண்டிய நிலை ஏற்பட்டதால் நாட்டின் பெருமளவிலான டொலர்கள் விரயமாக்கப்பட்டதாகவும் அவர் விவரித்தார். ரணில் விக்ரமசிங்கவின் அரசியல் எதிர்காலம் குறித்து எழுப்பப்பட்ட கேள்விக்கு பதிலளித்த விஜயதாச ராஜபக்ஷ, ரணில் விக்ரமசிங்க தற்போது நாடாளுமன்றத்தில் இல்லை எனவும், அவர் மீண்டும் ஆட்சிக்கு வருவதற்கான எந்தவொரு சாத்தியக்கூறும் இலங்கையில் இல்லை எனவும் தெரிவித்து தனது கருத்துரையை நிறைவு செய்தார்.