2029ஆம் நாமல் ராஜபக்சதான் ஜனாதிபதியாக தெரிவு செய்யப்படுவார் என்பதை அநுர அரசாங்கம் நன்கு அறிந்துள்ளது. அதனால் தான் போதைப் பொருள் வர்த்தகர்களுடன் ராஜபக்சர்களை தொடர்புபடுத்தி பிரசாரங்களை மேற்கொண்டு வருகின்றது என பொதுஜன பெரமுனவின் முன்னாள் நாடாளுமன்ற உறுப்பினர் திஸ்ஸ குட்டியாராச்சி தெரிவித்துள்ளார்.
ஊடகங்களுக்கு கருத்துத் தெரிவிக்கும் போதே அவர் மேற்கண்டவாறு குறிப்பிட்டார்.
நாமலுக்கு தொடர்பில்லை..
தொடர்ந்தும் தெரிவிக்கையில்,
எமது அரசாங்கத்திற்கு 69 இலட்சம் பேர் வாக்களித்தார்கள். அவர்களுள் போதைப்பொருள் வர்த்தகர்கள், தவறான தொழில்களில் ஈடுபடுபவர்கள் என பலர் இருக்க முடியும். அவர்களுடைய தனிப்பட்ட செயற்பாடுகளுக்கும் கட்சிக்கும் தொடர்பு கிடையாது.
ஐஸ் போதைப்பொருள் வர்த்தகர்களோடு நாமல் ராஜபக்சவை தொடர்புபடுத்தி பிரதி அமைச்சர் சுனில் வட்டகல கருத்து தெரிவிக்கின்றார். குறித்த சந்தேகநபர் அரசியல் செயற்பாடுகளில் ஈடுபடும் போது நாமல் ராஜபக்சவோடு இணைந்து புகைப்படம் எடுத்துக்கொண்டார் அவ்வளவே.
2029 ஆம் ஆண்டு நாமல் ராஜபக்ச ஜனாதிபதி ஆவார் என்பதை இந்த அரசு நன்கு அறிந்துள்ளது. இதனால் தான் ராஜபக்சர்களுக்கு எதிரான நடவடிக்கைகளை அரசாங்கம் மேற்கொண்டு வருகின்றது என்று குறிப்பிட்டுள்ளார்.