அம்பேவல பகுதியில், ஓடிக்கொண்டிருந்த ரயிலில் இருந்து செல்ஃபி எடுக்க முயன்ற வெளிநாட்டுப் பெண் சுற்றுலாப் பயணி ஒருவர் இன்று (19) காலை ரயிலில் இருந்து கீழே விழுந்து காயமடைந்துள்ளார்.
நானுஓயாவில் இருந்து பதுளை நோக்கிப் பயணித்துக் கொண்டிருந்த ரயிலிலேயே இந்த விபத்து இடம்பெற்றுள்ளதாக தெரிவிக்கப்பட்டுள்ளது.
ரயிலின் வாசல் பகுதியில் நின்றுகொண்டு, மலையகத்தின் இயற்கை எழில்மிகு காட்சிகளை பின்னணியாகக் கொண்டு செல்ஃபி புகைப்படம் எடுக்க முயன்றபோது, அவர் நிலைதடுமாறி கீழே விழுந்ததாக ஆரம்பகட்ட விசாரணைகளில் தெரியவந்துள்ளது.
விபத்தில் காயமடைந்த வெளிநாட்டுப் பெண் உடனடியாக மீட்கப்பட்டு, சிகிச்சைக்காக நுவரெலியா பொது வைத்தியசாலையில் அனுமதிக்கப்பட்டுள்ளார். அங்கு அவருக்கு தீவிர சிகிச்சை அளிக்கப்பட்டு வருவதாக வைத்தியசாலை வட்டாரங்கள் தெரிவித்துள்ளன.
ஓடும் ரயிலின் படிக்கட்டுகளில் தொங்குவது, ஜன்னல் வழியாக வெளியே எட்டிப் பார்ப்பது மற்றும் ஆபத்தான முறையில் செல்ஃபி எடுக்க முயல்வது போன்ற செயல்களைத் தவிர்க்குமாறு ரயில்வே திணைக்களம் பயணிகளிடம் மீண்டும் அவசர வேண்டுகோள் விடுத்துள்ளது.
இவ்வாறான அலட்சியமான நடவடிக்கைகள் உயிருக்கு ஆபத்தான விபத்துகளுக்கு வழிவகுக்கும் என்பதால், பயணத்தின் போது பாதுகாப்பு வழிமுறைகளை கண்டிப்பாகப் பின்பற்றுமாறும் ரயில்வே திணைக்களம் வலியுறுத்தியுள்ளது.