விவசாயியிடம் இலஞ்சம் பெற முயன்ற கமநல உத்தியோகத்தர் கைது

மட்டக்களப்பு- சித்தாண்டியில் விவசாயியிடம் இலஞ்சம் பெற்ற கமநலஅபிவிருத்தி திணைக்கள உத்தியோகத்தர்
ஒருவர் கைது செய்யப்பட்டுள்ளார்.

குறித்த கைது நடவடிக்கையானது இன்று (5) இலஞ்ச ஊழல் ஒழிப்பு பிரிவினரால் மேற்கொள்ளப்பட்டுள்ளது.

சம்பவத்தில் 34 வயதுடைய நபர் ஒருவரே இவ்வாறு கைது செய்யப்பட்டுள்ளார்.

இலஞ்சம்

இதுபற்றி தெரியவருவதாவது, சித்தாண்டி பகுதியைச் சேர்ந்த விவசாயி ஒருவரின் வயலுக்கு உரம் பெற்று
தருவதாகவும் அத்துடன் மழை வெள்ளத்தால் வேளாண்மை சேதமடைந்ததற்கு நஷ்டஈடு பெற்று
தருவதாகவும் அதற்கு 50 ஆயிரம் ரூபா பணத்தை விவசாயிடம் இலஞ்சமாக கமநல
அபிவிருத்தி உத்தியோகத்தர் கோரியுள்ளார்.

இதனையடுத்து குறித்த விவசாயி கொழும்பிலுள்ள இலஞ்ச ஊழல் ஒழிப்பு பிரிவினரிடம்
முறைப்பாட்டையடுத்து சம்பவ தினமான இன்று பகல் செங்கலடி
பகுதியிலுள்ள வங்கி ஒன்றிற்கு அருகாமையில் கொழும்பில் இருந்து வந்த இலஞ்ச ஊழல்
ஒழிப்பு பிரிவினர் கண்காணித்துக் கொண்டிருந்தனர்.

கைது

இந்தநிலையில் விவசாயிடம் கமநல
அபிவிருத்தி உத்தியோகத்தர் 50 ஆயிரம் ரூபாவை இலஞ்சமாக பெற்றுக் கொண்ட நிலையில்
அங்கு மாறுவேடத்தில் இருந்த இலஞ்ச ஊழல் ஒழிப்பு பிரிவினர் சுற்றிவளைத்து
கைதுசெய்ததுடன் 50 ஆயிரம் ரூபாவை மீட்டுள்ளனர்.

மேலும், கைது செய்யப்பட்டவரை  நீதிமன்றில் முன்னிலைப்படுத்தி கொழும்புக்கு கொண்டு செல்வதற்கான நடவடிக்கையை இலஞ்ச ஊழல் ஒழிப்பு பிரிவினர்
மேற்கொண்டு வருவதாக பொலிஸார் தெரிவித்துள்ளனர்.