இலங்கையின் பொருளாதாரம் தொடர்ச்சியான அதிர்ச்சிகளுக்கு மத்தியிலும் குறிப்பிடத்தக்க மீள்திறனை வெளிப்படுத்தி வருவதாக சர்வதேச நாணய நிதியம் (IMF) தெரிவித்துள்ளது.
அதேவேளை, பொருளாதார ஸ்திரத்தன்மையை மேலும் வலுப்படுத்த நிதி மற்றும் வெளிநாட்டு கையிருப்புகளை கட்டியெழுப்புவதுடன், கட்டமைப்பு சீர்திருத்தங்களை தொடர்ந்து முன்னெடுக்க வேண்டியது அவசியம் எனவும் IMF வலியுறுத்தியுள்ளது.
சர்வதேச நாணய நிதியத்தின் இலங்கைக்கான குழு, இவான் பாபஜார்ஜியோ தலைமையில், செப்டெம்பர் 10 முதல் 23ஆம் திகதி வரை இலங்கையில் பயணம் மேற்கொண்டது.
இந்த விஜயத்தின்போது, அண்மைக்கால பேரண்டப் பொருளாதார மாற்றங்கள், விரிவாக்கப்பட்ட நிதிய வசதி (EFF) ஏற்பாட்டின் கீழ் பொருளாதார மற்றும் நிதிக் கொள்கைகளை நடைமுறைப்படுத்துவதில் ஏற்பட்டுள்ள முன்னேற்றம் மற்றும் 2026ஆம் ஆண்டுக்கான பிரிவு IV ஆலோசனையின் கொள்கை பரிந்துரைகள் தொடர்பில் கலந்துரையாடல்கள் இடம்பெற்றன.
விஜயத்தின் நிறைவில் இவான் பாபஜார்ஜியோ வெளியிட்ட அறிக்கையிலேயே இந்த விடயங்கள் தெரிவிக்கப்பட்டுள்ளன.
அறிக்கையில் தெரிவிக்கப்பட்டுள்ளதன்படி, 2026ஆம் ஆண்டின் இரண்டாம் காலாண்டில் இலங்கையின் பொருளாதாரச் செயற்பாடு 4.2 சதவீதம் விரிவடைந்துள்ளது. இதன்மூலம் தொடர்ந்து 11 காலாண்டுகளாக பொருளாதார வளர்ச்சி வலுவாகப் பதிவாகியுள்ளது.
உலகளாவிய எண்ணெய் விலை அதிர்ச்சியின் தாக்கத்தால் 2026 ஆகஸ்ட் மாதத்தில் ஒட்டுமொத்த பணவீக்கம் ஆண்டுக்கு ஆண்டு அடிப்படையில் 8 சதவீதமாக உயர்ந்த போதிலும், பணவீக்க எதிர்பார்ப்புகள் பரவலாக நிலைத்திருப்பதாக IMF தெரிவித்துள்ளது.
அத்துடன், மொத்த உத்தியோகபூர்வ வெளிநாட்டு கையிருப்பு 2026 ஆகஸ்ட் மாத இறுதியில் 6.9 பில்லியன் அமெரிக்க டொலர்களாக அதிகரித்துள்ளது.
இலங்கையின் வங்கித்துறை தொடர்ந்து வலுவான மூலதனத்துடனும் இலாபகரமாகவும் இயங்கி வருவதாகவும் IMF குறிப்பிட்டுள்ளது.
2026ஆம் ஆண்டின் முதல் பாதியில் நாட்டின் நிதிநிலை வலுவாக இருந்ததுடன், கடன் மறுசீரமைப்பும் பெருமளவில் நிறைவடைந்துள்ளதாக தெரிவிக்கப்பட்டுள்ளது.
எனினும், மத்திய கிழக்கு மோதலின் கால அளவு மற்றும் தீவிரம், உலகளாவிய வர்த்தகக் கொள்கையில் ஏற்படக்கூடிய மாற்றங்கள் மற்றும் எல் நினோவின் தாக்கம் உள்ளிட்ட காரணிகளால் இலங்கை தொடர்ந்து பாதகமான அபாயங்களை எதிர்கொண்டு வருவதாக IMF சுட்டிக்காட்டியுள்ளது.
இந்த நிலையில், பொருளாதார அதிர்ச்சிகளை எதிர்கொள்ளும் திறனை வலுப்படுத்த நிதி மற்றும் வெளிநாட்டு கையிருப்புகளை மீளக் கட்டியெழுப்புதல், விலை நிலைத்தன்மையைப் பேணுதல் மற்றும் ஆளுகை சீர்திருத்தங்களை தொடர்ந்து முன்னெடுத்தல் அவசியம் என வலியுறுத்தப்பட்டுள்ளது.
அதேவேளை, மிகவும் பாதிக்கப்படக்கூடிய மக்களைப் பாதுகாப்பதற்காக சமூகப் பாதுகாப்பு வலைகளை மேலும் வலுப்படுத்த வேண்டியதன் அவசியத்தையும் IMF சுட்டிக்காட்டியுள்ளது.
வரி அமைப்பின் செயல்திறன் மற்றும் நேர்மையை மேம்படுத்தும் வகையில், நடுத்தர கால வருவாய் உத்தியை உருவாக்கி நடைமுறைப்படுத்துவது முக்கியமானது எனவும் தெரிவிக்கப்பட்டுள்ளது.
வரி அடித்தளத்தை விரிவுபடுத்துதல், வரி விலக்குகள் மற்றும் சலுகைகளை முறைப்படுத்துதல், வருவாய் நிர்வாகத்தை வலுப்படுத்துதல் மற்றும் வரி இணக்கத்தை மேம்படுத்துதல் ஆகிய நடவடிக்கைகள் நீடித்த வருவாய் அதிகரிப்புக்கு உதவும் என IMF குறிப்பிட்டுள்ளது.
மேலும், செலவு மீட்பு அடிப்படையிலான எரிசக்தி விலை நிர்ணயத்தை தொடர்ந்து பேணுவது அரசுக்குச் சொந்தமான நிறுவனங்களால் ஏற்படக்கூடிய நிதி அபாயங்களைக் குறைக்க உதவும் எனவும் தெரிவிக்கப்பட்டுள்ளது.
டித்வா புயல் தொடர்பான மீட்பு மற்றும் புனரமைப்புப் பணிகளை விரைவுபடுத்துவதுடன், மூலதனச் செலவினங்களை நடைமுறைப்படுத்துவதில் உள்ள தடைகளை அகற்றுவதும் முக்கியம் என IMF வலியுறுத்தியுள்ளது.
பணவீக்கத்தை கட்டுப்படுத்தும் வகையில் பணவியல் கொள்கை தயாராக இருக்க வேண்டும் என்றும், அதிர்ச்சிகளை எதிர்கொள்ளவும் வெளிநாட்டு கையிருப்புகளை அதிகரிக்கவும் நாணய மாற்று விகிதத்தில் அதிக நெகிழ்வுத்தன்மை அவசியம் என்றும் தெரிவிக்கப்பட்டுள்ளது.
முதல் சட்டப்பூர்வ மதிப்பாய்வில் 5 சதவீத பணவீக்க இலக்கையும் தற்போதைய பொறுப்புக்கூறல் வரம்பையும் தொடர்வது விவேகமானதாக இருக்கும் என IMF தெரிவித்துள்ளது.
அதேவேளை, உணவு மற்றும் எரிசக்தி விலைகளில் அதிக ஏற்ற இறக்கங்கள் காணப்படும் சூழலில் தற்போதைய இலக்கு இலங்கைக்கு தேவையான நெகிழ்வுத்தன்மையை வழங்குவதாகவும் குறிப்பிடப்பட்டுள்ளது.
நிலையான மற்றும் குறைந்த பணவீக்கத்தின் சாதனைப் பதிவு உருவான பின்னர், எதிர்கால மதிப்பாய்வில் குறைந்த பணவீக்க இலக்கை நோக்கிய ஒருங்கிணைவு குறித்து பரிசீலிக்க முடியும் எனவும் IMF கூறியுள்ளது.
பொதுமக்களின் நம்பிக்கையை வலுப்படுத்த ஊழல் எதிர்ப்புச் சட்டக் கட்டமைப்பின் ஒருமைப்பாட்டை பாதுகாப்பது இன்றியமையாதது என்றும் IMF வலியுறுத்தியுள்ளது.
அண்மையில் முன்வைக்கப்பட்டுள்ள சில சட்டத் திருத்தங்கள் வெளிப்படைத்தன்மை மற்றும் பொறுப்புக்கூறலை பலவீனப்படுத்தக்கூடும் என்பதால், அவை தொடர்பில் கவனம் செலுத்தப்பட வேண்டும் எனவும் சுட்டிக்காட்டப்பட்டுள்ளது.
மேலும், பொருளாதாரத்தை நிலைப்படுத்தும் நிலையிலிருந்து உருமாற்றும் நிலைக்கு கொண்டு செல்ல வர்த்தகத் தாராளமயமாக்கல், வணிக மற்றும் தொழிலாளர் விதிமுறைகளை நவீனமயமாக்குதல், நிதிக்கான அணுகலை விரிவுபடுத்துதல் மற்றும் டிஜிட்டல் மயமாக்கலை முன்னெடுத்தல் போன்ற கட்டமைப்பு சீர்திருத்தங்களுக்கு தொடர்ச்சியான வேகம் தேவைப்படுவதாக IMF தெரிவித்துள்ளது.
இத்தகைய சீர்திருத்தங்கள் முதலீடுகளை ஈர்ப்பதற்கும், வேலைவாய்ப்புகளை உருவாக்குவதற்கும், நீண்டகால பொருளாதார வளர்ச்சியை வலுப்படுத்துவதற்கும் உதவும் எனவும் குறிப்பிடப்பட்டுள்ளது.
இதனிடையே, IMF குழு யாழ்ப்பாணத்திற்கும் விஜயம் செய்து வட மாகாணத்தின் பொருளாதார ஆற்றல் தொடர்பில் நேரடியாக அறிந்துகொண்டுள்ளது.
யாழ்ப்பாணத்தில் தனியார் துறை மற்றும் சிவில் சமூக பிரதிநிதிகளுடன் இடம்பெற்ற கலந்துரையாடல்களில், இணைப்பு வசதிகள், திறன் மேம்பாடு மற்றும் விவசாயம், மீன்பிடி, சுற்றுலா, புதுப்பிக்கத்தக்க எரிசக்தி உள்ளிட்ட துறைகளில் முதலீடுகளை அதிகரிப்பதன் மூலம் பொருளாதார வளர்ச்சியையும் வேலைவாய்ப்புகளையும் உருவாக்குவதற்கான வாய்ப்புகள் குறித்து கவனம் செலுத்தப்பட்டுள்ளது.
இலங்கையின் பொருளாதார மாற்றத்தின் பலன்கள் பரவலாக மக்களை சென்றடைவதை உறுதிப்படுத்த சமூகப் பாதுகாப்பு நடவடிக்கைகளை மேலும் வலுப்படுத்த வேண்டியதன் அவசியமும் இதன்போது வலியுறுத்தப்பட்டுள்ளது.
இலங்கைக்கான விஜயத்தின்போது IMF குழு ஜனாதிபதியும் நிதியமைச்சருமான அனுர குமார திஸாநாயக்க, பிரதமர் கலாநிதி ஹரிணி அமரசூரிய, தொழிலாளர் நலத்துறை அமைச்சர் மற்றும் நிதி மற்றும் திட்டமிடல் துறை பிரதி அமைச்சர் பேராசிரியர் அனில் ஜயந்த பெர்னாண்டோ, இலங்கை மத்திய வங்கியின் ஆளுநர் கலாநிதி பி. நந்தலால் வீரசிங்க, திறைசேரி செயலாளர் கலாநிதி ஹர்ஷன சூரியப்பெரும உள்ளிட்ட அரசாங்க மற்றும் மத்திய வங்கி உயர் அதிகாரிகளை சந்தித்துள்ளது.
அத்துடன், ஜனாதிபதியின் சிரேஷ்ட பொருளாதார ஆலோசகர் துமிந்த ஹுலங்கமுவ, டிஜிட்டல் பொருளாதாரம் தொடர்பான ஜனாதிபதியின் தலைமை ஆலோசகர் கலாநிதி ஹன்ஸ் விஜயசூரிய, வட மாகாண ஆளுநர் நாகலிங்கம் வேதநாயகம் உள்ளிட்டோருடனும் கலந்துரையாடல்கள் இடம்பெற்றுள்ளன.
மேலும், நாடாளுமன்ற உறுப்பினர்கள், தனியார் துறை பிரதிநிதிகள், சிவில் சமூக அமைப்புகள் மற்றும் அபிவிருத்திப் பங்காளர்களையும் IMF குழு சந்தித்துள்ளது.
சிறந்த கொள்கைகள் மற்றும் சீர்திருத்தங்களை வெற்றிகரமாக நடைமுறைப்படுத்துவதற்கான சாதனைப் பதிவை உருவாக்குவது, இலங்கையின் பொருளாதார மீள்திறனை மேலும் வலுப்படுத்துவதுடன், பொதுமக்களின் நம்பிக்கையை நீடித்த வகையில் மீட்டெடுத்து, வலுவான மற்றும் அனைவரையும் உள்ளடக்கிய பொருளாதார வளர்ச்சியின் மூலம் வாழ்க்கைத் தரத்தை மேம்படுத்த உதவும் என IMF தெரிவித்துள்ளது.