பொதுப் பாதுகாப்பு அமைச்சர் ஆனந்த விஜேபாலவின் புகைப்படம் என போலியான புகைப்படத்தை உருவாக்கியவர்களுக்கு எதிராக சட்ட நடவடிக்கை எடுக்கப்படும் என அறிவிக்கப்பட்டுள்ளது.
இது தொடர்பான அறிக்கையை பொதுப் பாதுகாப்பு மற்றும் நாடாளுமன்ற விவகார அமைச்சு வெளியிட்டுள்ளது.
அந்த அறிக்கையில் மேலும், “இலங்கையில் பல்வேறு ஒழுங்கமைக்கப்பட்ட குற்றங்களுடன் தொடர்புடையதாக வெளிநாட்டில் இருந்தபோது கைது செய்யப்பட்ட கெஹல்பத்தர பத்மே உள்ளிட்ட ஒரு குழு, இலங்கை மற்றும் இந்தோனேசிய காவல்துறையினரின் கூட்டு நடவடிக்கையில் சமீபத்தில் இந்தோனேசியாவில் கைது செய்யப்பட்டனர்.
சிறிய நிகழ்வு
கைது செய்யப்பட்ட குழு நேற்று(30) இலங்கைக்கு அழைத்து வரப்பட்டது. இந்தோனேசிய காவல்துறை அதிகாரிகளும் அதன்போது கலந்து கொண்டிருந்தனர்.
இந்த நடவடிக்கையில் ஈடுபட்ட இலங்கை காவல்துறை அதிகாரிகளுக்கு தேவையான ஊக்கத்தை வழங்கவும், இந்த நடவடிக்கையில் ஈடுபட்ட இந்தோனேசிய காவல்துறை அதிகாரிகளுக்கு இலங்கை அரசாங்கத்தின் சார்பாக நன்றி தெரிவிக்கவும் கட்டுநாயக்காவில் உள்ள பண்டாரநாயக்க சர்வதேச விமான நிலையத்தில் ஒரு சிறிய விழா நடைபெற்றது.
குறித்த நிகழ்வில் பொது பாதுகாப்பு மற்றும் நாடாளுமன்ற விவகார அமைச்சர் ஆனந்த விஜேபால மற்றும் காவல்துறை மா அதிபர் பிரியந்த வீரசூரிய ஆகியோர் கலந்து கொண்டனர்.
நிகழ்வில் பங்கேற்ற இலங்கை காவல்துறை அதிகாரிகள் மற்றும் இந்தோனேசிய காவல்துறை அதிகாரிகளுக்கு நினைவுப் பலகைகள் மற்றும் விருதுகளை வழங்கும் நிகழ்விற்கு அமைச்சர் ஆனந்த விஜேபால தலைமை தாங்கினார்.
சட்ட நடவடிக்கை
இருப்பினும், இந்த சம்பவம் தொடர்பான போலியான திருத்தப்பட்ட புகைப்படங்கள் மற்றும் செய்திகள் சமூக ஊடகங்களில் பரவி வருவது அவதானிக்கப்பட்டது.
அதன்படி, அமைச்சர் ஆனந்த விஜேபாலவின் எனக் கூறப்படும் போலி புகைப்படம் சமூக ஊடகங்களில் பரவி வருகிறது.
அந்தப் போலி புகைப்படங்களையும், போலிச் செய்திகளையும் நாங்கள் கடுமையாக நிராகரிக்கிறோம். அந்தப் போலி புகைப்படங்களைத் தயாரித்து வெளியிடும் நபர்கள் மீது சட்ட நடவடிக்கை எடுக்க எதிர்பார்க்கிறோம்.
அனைத்து ஊடக நிறுவனங்களும் சமூக ஊடக பயனர்களும், குறிப்பாக ஒழுங்கமைக்கப்பட்ட குற்றம் மற்றும் போதைப்பொருட்களை எதிர்த்துப் போராடுவதற்கான சிறப்பு நடவடிக்கைகளின் போது, சமூக ஊடகங்கள் மற்றும் பிற ஊடகங்களில் உண்மையான மற்றும் துல்லியமான தகவல்களை மட்டுமே பரப்புமாறு கேட்டுக்கொள்கிறோம்.” என தெரிவிக்கப்பட்டுள்ளது.