நாட்டில் நிலவும் அனர்த்த நிலைமையைப் பயன்படுத்தி, சமூக ஊடகங்களில் முறையற்ற
மற்றும் உண்மைக்குப் புறம்பான செய்திகளைப் பரப்பி, பொதுமக்களிடையே
குழப்பத்தையும் அச்சத்தையும் ஏற்படுத்தும் நபர்களுக்கு எதிராகக் கடுமையான சட்ட
நடவடிக்கை எடுக்கப்படும் என்று காவல்துறை ஊடகப் பேச்சாளர், உதவி பொலிஸ்
அத்தியட்சகர் எஃப்.யு. வுட்லர் திட்டவட்டமாக எச்சரிக்கை விடுத்துள்ளார்.
குழப்பத்தை விளைவிக்கும் வகையிலான சம்பவங்கள் தொடர்பில் குற்றப் புலனாய்வுத்
திணைக்களத்துக்கு முறைப்பாடுகள் கிடைத்துள்ளதாகவும், அதன் கணினி குற்ற
விசாரணைப் பிரிவு உடனடியாக விசாரணைகளைத் தொடங்கியுள்ளதாகவும் அவர்
தெரிவித்தார்.
சட்ட நடவடிக்கை
மேலும், பொய்யான தகவல்களைப் பரப்புவது தண்டனைக்குரிய குற்றம் எனச்
சுட்டிக்காட்டி, வதந்திகளைப் பரப்புபவர்கள் கைது செய்யப்பட்டுச் சட்டத்தின்
முன் நிறுத்தப்படுவார்கள் என்றும் அவர் வலியுறுத்தினார்.
அனர்த்த நிவாரண முகாம்கள் மற்றும் பாதிக்கப்பட்ட பகுதிகளில், துஷ்பிரயோகம்,
திருட்டு, கொள்ளை போன்ற குற்றச் செயல்களில் ஈடுபடும் எவர் மீதும் சட்டம் மிகக்
கடுமையாக நடைமுறைப்படுத்தப்படும் என்றும் காவல்துறை ஊடகப் பேச்சாளர் எச்சரித்தார்.
அனர்த்த காலத்தில் பொதுமக்களின் பாதுகாப்புக்கு காவல்துறை அதிக முன்னுரிமை
அளித்து வருவதாகவும், எனவே பொதுமக்கள் அனைவரும் பொறுப்புடனும்
ஒத்துழைப்புடனும் செயற்படுமாறு அவர் கேட்டுக்கொண்டார்.
வெளிநாட்டுச் சுற்றுலாப் பயணிகள் அவசரத் தேவைகளுக்கு $1912$ என்ற விசேட அவசர
இலக்கத்தைத் தொடர்புகொள்ளுமாறும் அவர் வேண்டுகோள் விடுத்துள்ளார்.