இலங்கையின் மருத்துவத் துறையில் புதிய மைல்கல்லாக, செயற்கை நுண்ணறிவு (AI) கொண்ட ரோபோ தொழில்நுட்பத்தின் உதவியுடன் முதன்முறையாக இரண்டு வெற்றிகரமான அறுவை சிகிச்சைகள் மேற்கொள்ளப்பட்டுள்ளன.
இந்த அறுவை சிகிச்சைகள் அண்மையில் கொழும்பிலுள்ள தனியார் வைத்தியசாலை ஒன்றில் இடம்பெற்றதாக தெரிவிக்கப்படுகின்றது. ரோபோ தொழில்நுட்பத்தின் உதவியுடன் மருத்துவ நிபுணர்கள் இருவர் இணைந்து இந்த சிகிச்சைகளை வெற்றிகரமாக நிறைவேற்றியுள்ளனர்.
அவற்றில் ஒன்று சுமார் 50 வயதுடைய பெண் ஒருவரின் கருப்பையை அகற்றும் அறுவை சிகிச்சையாகவும், மற்றொன்று சிறுநீரகம் தொடர்பான சிக்கலான அறுவை சிகிச்சையாகவும் அமைந்துள்ளது.
இந்த தொழில்நுட்பத்தில் ரோபோ தன்னிச்சையாக அறுவை சிகிச்சை மேற்கொள்வதில்லை. மாறாக, அறுவை சிகிச்சை நிபுணர் விசேட கட்டுப்பாட்டு அமைப்பின் மூலம் ரோபோ கைகளைக் கட்டுப்படுத்துகிறார். அந்த அசைவுகளை ரோபோ மிகத் துல்லியமாக நோயாளியின் உடலினுள் செயல்படுத்துகிறது.
செயற்கை நுண்ணறிவு மற்றும் நவீன நிரலாக்க தொழில்நுட்பங்களின் ஆதரவால், மனிதக் கைகளால் மேற்கொள்ள கடினமான மிக நுண்ணிய அசைவுகளையும் இந்த அமைப்பு அதிக துல்லியத்துடன் மேற்கொள்ளும் திறன் கொண்டதாக மருத்துவர்கள் தெரிவித்துள்ளனர்.
இந்த அறுவை சிகிச்சைகள் குறித்து கருத்து தெரிவித்த வைத்தியர் சமந்தி டி சில்வா, ரோபோ தொழில்நுட்பத்தின் மூலம் குறைந்த இரத்தப்போக்கு, பெரிய வெட்டுக்கள் தேவையின்மை, உடலின் நுண்ணிய பகுதிகளில் அதிக துல்லியத்துடன் அறுவை சிகிச்சை செய்யும் வசதி, தொற்று அபாயம் குறைதல், நோயாளி விரைவாகக் குணமடைவது மற்றும் அறுவை சிகிச்சைப் பிழைகள் குறைவது உள்ளிட்ட பல நன்மைகள் கிடைப்பதாக தெரிவித்தார்.
அத்துடன், பாரம்பரிய அறுவை சிகிச்சை முறைக்குத் தேவைப்படும் பணியாளர்களை விடக் குறைந்த எண்ணிக்கையிலான ஊழியர்களின் பங்களிப்புடன் இந்த அறுவை சிகிச்சைகளை மேற்கொள்ள முடியும் என்றும் அவர் சுட்டிக்காட்டினார்.
இந்த ரோபோ அமைப்பின் மற்றொரு சிறப்பம்சமாக, அறுவை சிகிச்சையை ஆரம்பிப்பதற்கு முன்பே முழு செயல்முறையையும் திட்டமிட்டு பயிற்சி மேற்கொள்ளும் வசதி இருப்பதாகவும், இதன் மூலம் வைத்தியர்கள் முழுமையான தயாரிப்புடன் சிகிச்சையை மேற்கொள்ள முடியும் என்றும் தெரிவிக்கப்பட்டுள்ளது.
இந்த தொழில்நுட்பத்தைப் பயன்படுத்துவதற்காக சம்பந்தப்பட்ட அறுவை சிகிச்சை நிபுணர் சீனாவில் விசேட பயிற்சி பெற்றுள்ளதாகவும், எதிர்காலத்தில் மேலும் 30-க்கும் அதிகமான வைத்தியர்களுக்கு இந்த நவீன ரோபோ அறுவை சிகிச்சை தொழில்நுட்பத்தில் பயிற்சி வழங்கத் திட்டமிடப்பட்டுள்ளதாகவும் வைத்தியர் சமந்தி டி சில்வா தெரிவித்தார்.
மேலும், இதுவரை புரோஸ்டேட் புற்றுநோய் உள்ளிட்ட சிக்கலான அறுவை சிகிச்சைகளுக்காக வெளிநாடுகளுக்குச் செல்ல வேண்டியிருந்த இலங்கையர்களுக்கு, இனி நாட்டிலேயே உயர்தர ரோபோ அறுவை சிகிச்சை சேவைகளைப் பெறும் வாய்ப்பு அதிகரிக்கும் என அவர் நம்பிக்கை வெளியிட்டார்.
இந்த தொழில்நுட்பம் எதிர்காலத்தில் மேலும் பல வைத்தியசாலைகளுக்கு விரிவுபடுத்தப்பட்டால், சிக்கலான அறுவை சிகிச்சைகளுக்காக வெளிநாடுகளுக்குச் செல்லும் நோயாளிகளின் எண்ணிக்கை குறைவதுடன், இலங்கை தெற்காசியாவின் நவீன அறுவை சிகிச்சை சேவை மையமாக உருவெடுக்கும் வாய்ப்பும் இருப்பதாக அவர் தெரிவித்தார்.