போதைப்பொருள் கட்டுப்படுத்தலில் கடற்படை ஒரு குறிப்பிட்ட பாத்திரத்தை மட்டுமே
வகிக்கமுடியும் என சுட்டிக்காட்டிய சிறிலங்கா கடற்படையின் பிராந்திய கட்டளைத்
தளபதி அட்மிரல் புத்திக லியனகமகே பொதுமக்களது பங்களிப்பும் எமக்கு கிடைக்கப்
பெற்றால் முழுமையான இலக்கை எட்ட முடியும் என தெரிவித்தார்.
கடற்படையின் 75 ஆவது ஆண்டு நிறைவை முன்னிட்டு காங்கேசன்துறை கடற்படை தளத்தில்
இன்றையதினம் (12.10.2025) மேற்கொண்ட ஊடக சந்திப்பில் இவ்வாறு தெரிவித்த அவர்
மேலும் கூறுகையில்,
வடக்கு கடல் மார்க்கமாக போதைபொருள் கடத்தல்
வடக்கு கடல் மார்க்கமாக போதைபொருள் கடத்தல் நடைபெற்றுவருவது குறித்து நாம் அதிக
அக்கறை செலுத்தி மேற்கொண்ட முயற்சிகளால் பலர் கைது செய்யப்பட்டுள்ளனர்.
இன்னுன் பல நூறு கிலோ போதைப் பொருள்களும் கைப்பற்றப்பட்டன.
குறித்த குற்றத்துடன் தொடர்புடைய பலர் சட்டத்தின் முன் நிறுத்தப்பட்டும்
உள்ளனர்.
இதே நேரம் கடற்படை ஒரு பிரதேசத்துக்கானதல்ல. அது நாடு முழுவதுக்குமான ஒரு
பாதுகாப்புக் கட்டமைப்பு.
இலங்கைத் தீவின் அனைத்து கடற்பரப்பினதும் பாதுகாப்பு எம்மிடம்
வழங்கப்பட்டுள்ளது. அதை நாம் முடியுமானவரை திறன்பட செய்துவருகின்றோம்.
மக்களும் ஒத்துழைக்கவேண்டும்
கடற்படைக்கு உள் நாடு புலனாய்வு கட்டமைப்பின் தகவல் மட்டுமல்லாது சர்வதேச புலனாய்வு
தகவல்களும் கிடைக்கப்பெற்று துரித நடவடிக்கை எடுக்கின்றது.
ஆனாலும் எமக்கு பாதுகாப்பு அமைச்சின் அனுமதிகள் அவசியம்.
அந்தவகையில் எமக்கு கிடைக்கின்ற தகவல்களுடன் மக்களாகிய நீங்களும் தகவல்களை
வழங்கி குறித்த செயலில் ஈடுபடும் தரப்பையும் அவர்களது கட்டமைப்பையும்
இல்லாதொழித்து போதைப்பொருள் அபாயத்திலிருந்து நாட்டை பாதுகாத்துக்கொள்ள
முடியும் என்றார்.