ஈழத் தமிழர்களுக்கு இழைத்த துரோகத்திற்கு இறைவன் அளித்த தண்டனையே முன்னாள் ஜனாதிபதி ரணில் விக்ரமசிங்க சிறையில் இருக்க காரணம் என கல்முனை மாநகர சபையின் முன்னாள் உறுப்பினர் சந்திரசேகரன் ராஜன் தெரிவித்துள்ளார்.
கல்முனை ஊடக மையத்தில் நேற்று (24) இடம்பெற்ற ஊடக சந்திப்பில் ஊடகவியலாளர் எழுப்பிய கேள்விக்கு பதில் அளிக்கையில் அவர் மேற்கண்டவாறு தெரிவித்தார்.
கடவுளால் கொடுக்கப்பட்ட தண்டனை
அங்கு அவர் மேலும் கருத்து தெரிவிக்கையில்,”ரணில் விக்ரமசிங்க நாட்டுக்கு தான் பிரதமராகவும் ஜனாதிபதியாகவும் இருந்தாரே அன்றி எமது தமிழ் சமூகத்திற்கு துரோகம் செய்திருக்கிறார்.
அதாவது 2015 ஆண்டு நல்லாட்சி அரசாங்கத்தில் எமது கல்முனை வடக்கு பிரதேச செயலகம் தொடர்பாக தீர்வு ஒன்றினை பெற்றுத் தருமாறு நாடாளுமன்ற கட்டட தொகுதியில் அவரின் காலில் விழுந்து கேட்டபோது இரவோடு இரவாக உடனே செய்து தருகிறேன் என்று கூறி அதை செய்து தரவில்லை.
இது தவிர இன்னும் ஒரு பாரதூரமான விடயம் ஒன்று உள்ளது. எமது இனத்திற்காக போராட்டத்தில் ஈடுபட்டதமிழீழ விடுதலைப் புலிகள் இயக்கத்தை நரி தந்திரத்தை பயன்படுத்தி இரண்டாகப் பிரித்தவர் இந்த ரணில் விக்ரமசிங்க தான்.
இவருக்கு இன்று ஆண்டவன் ஒரு தண்டனை கொடுத்திருக்கிறான்.
இந்த தண்டனை தமிழர்களால் முஸ்லிம்களாலோ அவருக்கு வழங்கப்படவில்லை.அது அவருக்கு கடவுளால் கொடுக்கப்பட்ட தண்டனை.
அவருடைய இனம் சமுகத்தாலேயே அந்த தண்டனை வழங்கப்பட்டிருக்கின்றது. ஆனால் அது கடவுளால் கொடுக்கப்பட்டிருக்கிறது என்று நினைக்கிறேன். இந்த விடயத்திற்கு கடவுள் தான் பதில் கொடுக்க வேண்டும்.”என குறிப்பிட்டார்.