அதிபர் தேர்தல் குறித்து ரணில் வழங்கிய உறுதி

“அதிபர் தேர்தலை (Presidential Election) ஒத்திவைக்கும் எவ்வித திட்டமும் இல்லை, என அதிபர் ரணில் விக்ரமசிங்க (Ranil Wickremesinghe) என்னிடம் உறுதியாகக் கூறினார்.” என ஐக்கிய மக்கள் சக்தியின் (SJB) நாடாளுமன்ற உறுப்பினர் ராஜித சேனாரத்ன (Rajitha Senaratne) தெரிவித்துள்ளார்.

ஊடகங்களுக்கு கருத்து தெரிவிக்கும் போதே அவர் இந்த விடயத்தை வெளியிட்டார். தொடர்ந்தும் கருத்து தெரிவித்த அவர் 

“அதிபர் தேர்தலை ஒத்திவைப்பது தொடர்பில் ஐக்கிய தேசியக் கட்சியின் பொதுச்செயலாளர் கருத்து வெளியிட்டுள்ளமை பரபரப்பை ஏற்படுத்தியுள்ளது.

அதிபர் தேர்தல் 

இது தொடர்பில் அதிபர் ரணில் விக்ரமசிங்கவிடம் வினவினேன். அதிபர் தேர்தலை ஒத்திவைக்கும் எவ்வித திட்டமும் இல்லை என்றும், தேர்தல் உரிய வகையில் நடத்தப்படும் என்றும் அதிபர் உறுதியளித்தார்.

அடுத்தது அதிபரின் பதவிக் காலம் நீடிப்பு பற்றியும் தகவல்கள் வெளியாகின. அது பற்றியும் வினவினேன். அவ்வாறு எவ்வித திட்டம் இல்லை என்றும் அதிபர் என்னிடம் குறிப்பிட்டார்.

வெற்றியோ, தோல்வியோ நிச்சயம் அதிபர் தேர்தல் நடத்தப்படும். தேர்தலில் யாருக்கு வாக்களிப்பது என்பது தொடர்பில் பெரும்பாலானவர்கள் இன்னும் தீர்மானம் எடுக்கவில்லை.” என தெரிவித்தார்.