சுனிதா வில்லியம்ஸ் (Sunitha Williams) பூமிக்கு திரும்புவதில் மீண்டும் சிக்கல் நிலை ஏற்பட்டுள்ளதாக சர்வதேச ஊடகங்கள் செய்தி வெளியிட்டுள்ளன.
அமெரிக்காவின் (United States) ஃபுளோரிடா (Florida) மாகாணத்தில் இருந்து விண்ணில் ஏவப்பட இருந்த ஃபால்கன் ஒன்பது விண்கலம் தொழில்நுட்ப கோளாறு காரணமாக விண்ணில் ஏவப்படாமல் கடைசி நேரத்தில் ஒத்திவைக்கப்பட்டது.
இந்த விண்கலம்தான் சர்வதேச விண்வெளி மையத்தில் சிக்கியுள்ள நாசா (NASA) விண்வெளி வீரர்களான சுனிதா வில்லியம்ஸ் மற்றும் புட்ச் வில்மோர் ஆகியோரை பூமிக்கு அழைத்துவர உள்ளது என தெரிவிக்கப்பட்டது.
தொழில்நுட்பக் கோளாறு
விண்கலம் ஏவுதளத்தில் இருந்த ஹைட்ராலிக் இயந்திரத்தில் தொழில்நுட்பக் கோளாறு ஏற்பட்டதால் விண்கலத்தை விண்ணில் செலுத்தும் இன்றைய திட்டம் தாமதமாகிவுள்ளதாக தெரிவிக்கப்பட்டுள்ளது.
தொழில்நுட்பக் கோளாறு காரணமாக ஸ்பேஸ்எக்ஸ் (SpaceX) இன் டிராகன் க்ரூ 10 திட்டம் தற்காலிகமாக ஒத்திவைக்கப்பட்டுள்ளது.
தொழில்நுட்ப கோளாறு சரி செய்யப்பட்டால் இந்திய நேரப்படி நாளை (14) அதிகாலை 4.56 மணிக்கு விண்கலத்தை விண்ணில் செலுத்த வாய்ப்பு உள்ளதாக நாசா மற்றும் ஸ்பேஸ்எக்ஸ் சார்பில் தெரிவிக்கப்பட்டது.
விண்வெளி துறை
நாசா விண்வெளி வீரர்களான ஆனி மெக்லைன், நிகோல் ஏயர்ஸ் மற்றும் ஜப்பான் விண்வெளி துறையை சேர்ந்த தகுயா ஒனிஷி மற்றும் ரோஸ்கோமோஸ் விண்வெளி வீரர் கிரில் பெஸ்கோவ் ஆகியோர் டிராகன் விண்கலத்தில் இருந்து வெற்றிகரமாக வெளியேறி விட்டனர்.
அத்தோடு, இந்த விண்கலமும் பத்திரமாக உள்ளதாக தெரிவிக்கப்பட்டது.
இன்றைய திட்டப்படி ஸ்பேக்ஸ்எக்ஸ் க்ரூ டிராகன் விண்வெளிக்கு புறப்பட்டு இருந்தால், சுனிதா வில்லியம்ஸ் மற்றும் புட்ச் வில்மோர் மார்ச் 19 ஆம் திகதி பூமிக்கு திரும்பியிருப்பர்.
தற்போது இந்த திட்டத்தில் மாற்றம் செய்யப்பட்டுள்ளதை அடுத்து, இருவரும் பூமிக்கு திரும்புவது மேலும் தாமதமாகி உள்ளமை குறிப்பிடத்தக்கது.