ரணில் – சஜித் கூட்டணி பேச்சுவார்த்தையில் இருந்து விலகிய அத்தநாயக்க

ஐக்கிய தேசியக் கட்சியுடன் (UNP) இணைவது குறித்து கலந்துரையாடல்களில் ஈடுபட்டுள்ள ஐக்கிய மக்கள் சக்தியின் குழுவிலிருந்து விலகுவதாக அக்கட்சியின் தேசிய அமைப்பாளர் திஸ்ஸ அத்தநாயக்க அறிவித்துள்ளார்.

இரு கட்சிகளுக்கும் இடையிலான எதிர்கால பேச்சுவார்த்தைகளில் தான் பங்கேற்கப் போவதில்லை என்றும் அவர் கூறியுள்ளார்.

 ஐந்து பேர் குழு

மேலும், வரவிருக்கும் தேர்தல்களுக்கான சாத்தியமான ஒத்துழைப்பு தொடர்பில் ஐக்கிய தேசியக் கட்சியுடன் கலந்துரையாடுவதற்காக, ஐக்கிய மக்கள் சக்தியின் பொதுச் செயலாளர் ரஞ்சித் மத்தும பண்டார தலைமையில் ஐந்து பேர் கொண்ட குழுவை அண்மையில் நியமித்தது.

குறித்த பேச்சுவார்த்தைக் குழுவிலிருந்து விலகும் அத்தநாயக்கவின் முடிவு இந்த விவாதங்களின் இயக்கவியலைப் பாதிக்கலாம் என தெரிவிக்கப்படுகின்றது. 

இருப்பினும், அவர் அந்த குழுவிலிருந்து விலகுவது தொடர்பில் ஐக்கிய மக்கள் சக்தியிடமிருந்து அதிகாரப்பூர்வ அறிவிப்பு எதுவும் இதுவரை வெளியிடப்படவில்லை.