இலங்கை தொழிலாளர் காங்கிரஸின் பொதுச் செயலாளர் நுவரெலியா மாவட்ட நாடாளுமன்ற உறுப்பினர் ஜீவன் தொண்டமான், குறித்த கட்சியின் பொதுச் செயலாளர் பதவியை இராஜினாமா செய்ய தீர்மானித்துள்ளதாக செய்திகள் வெளியாகி வருவதாகவும் இதற்காக கட்சியின் தேசிய சபையைக் கூட்டுமாறு கட்சியின் தலைவர்களுக்கு அறிவித்துள்ளதாகவும் செய்திகள் வெளியாகியுள்ளன.
எனினும், ஜீவன் தொண்டமான் இவ்விடயம் தொடர்பில் எந்தவொரு உத்தியோகபூர்வ அறிவிப்பையும் இதுவரையில் வெளியிடவில்லை.
பட்ஜெட் முன்மொழிவு
இலங்கை தொழிலாளர் காங்கிரஸுக்குத் தலைமை பதவியை வகிக்கும் அக்கரபத்தனை பிரதேச சபையின் 2026 ஆம் ஆண்டுக்காக பட்ஜெட் முன்மொழிவு தோற்கடிக்கப்பட்டதையடுத்து, இலங்கை தொழிலாளர் காங்கிரஸின் தற்போதைய தலைவர் செந்தில் தொண்டமான் மற்றும் கட்சியின் செயலாளர் ஜீவன் தொண்டமானுக்கும் இடையே தொலைபேசி மூலம் வாக்குவாதம் ஏற்பட்டுள்ளதாக கூறப்படுகிறது.
குறித்த வாக்குவாதத்தின் விளைவாக, இலங்கை தொழிலாளர் காங்கிரஸின் செயலாளர் பதவியில் இருந்து ஜீவன் தொண்டமான் இராஜினாமா செய்ய தீர்மானித்துள்ளதாக இலங்கை தொழிலாளர் காங்கிரஸின் மூத்த பிரதித் தலைவர் ஒருவர் தென்னிலங்கை ஊடகமொன்றிற்கு கருத்து தெரிவித்தார்.
தலவாக்கலை லிதுல, நுவரெலியா நகராட்சி மன்றம், ஹகுரன்கெத்த, வலப்பனை மற்றும் கொத்மலை ஆகிய உள்ளூராட்சி நிறுவனங்களில் உள்ள இலங்கை தொழிலாளர் காங்கிரஸின் கவுன்சிலர்களுக்கு அரசாங்கத்திற்கு வழங்கும் ஆதரவிலிருந்து விலகுவதற்கான கடிதங்களை வழங்குமாறு, கட்சியின் பொதுச் செயலாளர் கோரிக்கை விடுத்துள்ளதாகவும் அவர் சுட்டிக்காட்டினார்.
இலங்கை தொழிலாளர் காங்கிரஸின் தேசிய சபையைக் கூட்டுமாறு தொலைபேசி மூலம் அவருக்குத் தெரிவித்த போதிலும், கோரிக்கையை எழுத்துப்பூர்வமாக சமர்ப்பித்தால் மாத்திரமே இலங்கை தொழிலாளர் காங்கிரஸின் தேசிய சபை கூட்டப்படும் எனவும் தெரிவிக்கப்பட்டுள்ளமை குறிப்பிடத்தக்க விடயமாகும்.