ஹன்வெல்ல (Hanwella) எபுல்கம பிரதேசத்தில் 17 வயதுடைய பாடசாலை மாணவியை கடத்திச் சென்று தவறான முறைக்குட்படுத்திய ஐந்து இளைஞர்களும் கைது செய்யப்பட்டுள்ளனர்.
குறித்த கைது நடவடிக்கை இன்று (22) மேற்கொள்ளப்பட்டதாக நுகேகொட குற்றப் புலனாய்வுப் பிரிவு தெரிவித்துள்ளது.
இந்த நிலையில், சம்பவத்துடன் தொடர்புடைய சந்தேகநபர்களில் ஒருவர் இன்று (22) காலை சட்டத்தரணி ஊடாக ஹங்வெல்ல காவல் நிலையத்தில் சரணடைந்ததன் பின்னர் கைது செய்யப்பட்டதாகவும் சந்தேகநபரிடம் மேற்கொள்ளப்பட்ட விசாரணைகளின் போது தெரியவந்த உண்மைகளின் அடிப்படையில் ஏனைய நான்கு சந்தேக நபர்களும் கைது செய்யப்பட்டதாகவும் கூறப்படுகிறது.
விசாரணை
இதன் போது, 21 முதல் 24 வயதுடைய கடுவெல நவகமுவ பிரதேசத்தைச் சேர்ந்த ஐவர் கைது செய்யப்பட்டுள்ளனர்.
இதேவேளை, கைது செய்யப்பட்ட சந்தேகநபர்கள் நாளை (23) ஹோமாகம நீதவான் நீதிமன்றில் முன்னிலைப்படுத்தப்படவுள்ளனர்.
தனது காதலனைச் சந்தித்து விட்டு நேற்று (21) வீடு திரும்பிய பாடசாலை மாணவியை, மோட்டார் சைக்கிளில் 5 பேர் வலுக்கட்டாயமாக ஏற்றி ஜல்தர பகுதியில் நிர்மாணிக்கப்பட்டு வரும் சுடுகாட்டுக்கு அழைத்துச் சென்று தவறான முறைக்குட்படுத்திய சம்பவம் தொடர்பிலேயே இவர்கள் கைது செய்யப்பட்டுள்ளனர்.
அத்துடன், சம்பவம் நடந்த இடத்திற்கு சென்று நுகேகொடை குற்றத்தடுப்பு விசாரணை பிரிவு அதிகாரிகள், நுகேகொடை சிறுவர் மற்றும் பெண்கள் பணியக அதிகாரிகள், நுகேகொட பிரதேச குற்ற விசாரணை பிரிவு அதிகாரிகள், ஹேங் எல்ல காவல்துறை அதிகாரிகளுடன் இணைந்து விசாரணைகளை மேற்கொண்டுள்ளமை குறிப்பிடத்தக்கது.