இலங்கையின் மூத்த நடிகர் காலமானார்

இலங்கையின் சிங்கள திரையுலகின் மூத்த நடிகர் சதிச்சந்திர எதிரிசிங்க காலமானார்.

சதிச்சந்திர எதிரிசிங்க இன்று (23) காலை தனது 84 வயதில் காலமானதாக தென்னிலங்கை ஊடகங்கள் செய்தி வெளியிட்டுள்ளன.

உடல் நலக்குறைவு காரணமாக கொழும்பில் உள்ள ஒரு தனியார் மருத்துவமனையில் சிகிச்சை பெற்று வந்த நிலையில் அவர் காலமானதாக குடும்ப உறவினர்கள் தெரிவித்தனர். 

நீண்ட வரலாற்றைக் கொண்டது

1941 பெப்ரவரி 10 ஆம் திகதி களனியில் பிறந்த பட்டிகிரிகே சதிஸ்சந்திர எதிரிசிங்கவின் கலை வாழ்க்கை அரை நூற்றாண்டிற்கும் மேற்பட்ட நீண்ட வரலாற்றைக் கொண்டது.

பிரபல பாடகர் சுனில் எதிரிசிங்கவின் சகோதரரான, சதிச்சந்திர எதிரிசிங்க, சினிமா மற்றும் தொலைக்காட்சி நாடகங்களில் மறக்கமுடியாத வேடங்களில் நடித்துள்ளார்.

1986 ஆம் ஆண்டு காமினி பொன்சேகா இயக்கிய ‘கெட்டி வலிகய’ திரைப்படத்தில், ஒரு சிங்கள இளைஞனாக வெறும் 90 வினாடிகள் மட்டுமே நடித்ததற்காக அவர் விருது வழங்கி கௌரவிக்கப்பட்டார்.

அதேநேரம் 1987 ஆம் ஆண்டு சரசவி விருது விழாவில், பௌத்த துறவி ஒருவராக அவர் வெளிப்படுத்திய சிறந்த நடிப்புத் திறமைக்காக அவருக்கு சிறப்பு நடுவர் விருது வழங்கப்பட்டது. 1963 ஆம் ஆண்டு அவர் முதன்முதலில் தயாரித்த ‘பகதபஸ்’ என்ற மேடை நாடகம் அரங்கேற்றப்பட்டமையும் குறிப்பிடத்தக்கது.