மாணவனைக் கடத்தி பணத்தைக் கொள்ளையடித்த இருவர் கைது

பாடசாலை மாணவனொருவனைக் கடத்தி பெருந்தொகைப் பணத்தைக் கொள்ளையடித்த இரண்டு சந்தேக நபர்கள் பொலிஸாரினால் கைது செய்யப்பட்டுள்ளனர்.

இந்தச் சம்பவம் அநுராதபுரம் பிரதேசத்தில் நடைபெற்றுள்ளது.

அநுராதபுரம் (Anuradhapura) நகரில் உள்ள தனியார் வகுப்பொன்றுக்கு வந்த மாணவனை கத்தியை காட்டி கொலை மிரட்டல் விட்டு, பலவந்தமாக காரில் ஏற்றிச் சென்று 67,000 ரூபாயை கொள்ளையடிக்கப்பட்டுள்ளது.

பேருந்திற்காக காத்திருந்த மாணவன் 

கஹட்டகஸ்திகிலிய பிரதேசத்தில் இருந்து அநுராதபுரத்திற்கு தனியார் வகுப்புக்கு வந்த மாணவன் ஒருவரே இந்த சம்பவத்துக்கு முகம் கொடுத்துள்ளார்.

தனியார் வகுப்புகள் முடிந்ததும் அநுராதபுரம் புதிய நகரில் பேருந்திற்காக காத்திருந்த 18 வயதுடைய மாணவன் அருகில் கார் வந்து நின்றுள்ளது.

அதில் இருந்த நான்கு பேர் கத்தியைக் காட்டி மாணவனை, காருக்குள் பலவந்தமாக ஏற்றிக்கொண்டு, ஆள் நடமாட்டமற்ற இடத்திற்கு அழைத்துச் சென்று, அவரிடமிருந்த 2000 ரூபாய் பணத்தை அபகரித்ததுடன், வங்கி அட்டையையும் கைப்பற்றியுள்ளனர்.

மேலதிக விசாரணை

அதன்பின்னர், வங்கி தன்னியக்க இயந்திரம் இருக்கும் இடத்துக்கு சென்றவர்கள், அந்த மாணவனை அச்சுறுத்தி, இரகசிய இலக்கத்தை கேட்டு, வங்கி அட்டையில் இருந்து 65000 ரூபாவை வலுக்கட்டாயமாக எடுத்துக்கொண்டு, மாணவனை சிறிது தூரத்தில் இறக்கிவிட்டுவிட்டு காருடன் தப்பிச் சென்றுள்ளதாக பொலிஸில் முறைப்பாடு மேற்கொள்ளப்பட்டிருந்தது.

இதனையடுத்து மேற்கொள்ளப்பட்ட விசாரணைகள் மூலம் விஜய புர பிரதேசத்தை சேர்ந்த 29 வயதுடைய ஒருவரும், ஹிதோகம பஹலதுருவில பிரதேசத்தை சேர்ந்த 35 வயதான ஒருவரும் பொலிஸாரினால் கைது செய்யப்பட்டுள்ளனர்.

சம்பவம் தொடர்பான மேலதிக விசாரணைகளை அநுராதபுரம் பொலிஸார் முன்னெடுத்துள்ளனர்.