பில்லியன் டொலரை தாண்டியுள்ள இலங்கையின் ஏற்றுமதி வருமானம்

ஜனவரி மாதத்திற்கான நாட்டின் ஏற்றுமதி வருவாய் 1.3 பில்லியன் டொலரை தாண்டியுள்ளதாக ஏற்றுமதி மேம்பாட்டு வாரியம் தெரிவித்துள்ளது.

ஜனவரி மாதத்திற்கான சேவை ஏற்றுமதியின் மதிப்பு 329.37 மில்லியன் டொலராக இருந்த நிலையில், இது முந்தைய ஆண்டின் ஜனவரி மாதத்துடன் ஒப்பிடும்போது குறிப்பிடத்தக்க 37.87% அதிகரிப்பைக் குறிப்பதாக சுட்டிக்காட்டப்பட்டுள்ளது.

ஜனவரி மாதத்திற்கான வணிக ஏற்றுமதி வருவாய் 1,004.82 மில்லியன் டொலராக இருந்த நிலையில், இது முந்தைய ஆண்டின் ஜனவரி மாதத்துடன் ஒப்பிடும்போது 3.51% அதிகரிப்பைக் காட்டுவதாக தெரிவிக்கப்பட்டுள்ளது.

விவசாய ஏற்றுமதி

விவசாய ஏற்றுமதிகள் முந்தைய ஆண்டின் ஜனவரி மாதத்துடன் ஒப்பிடும்போது 14.87% குறிப்பிடத்தக்க வளர்ச்சியைக் காட்டி 258.93 மில்லியன் டொலரை எட்டியுள்ளதாக தெரிவிக்கப்பட்டுள்ளது.

தொழில்துறை ஏற்றுமதிகள் ஜனவரி மாதத்தில் 0.08% சிறிய வளர்ச்சியைக் கண்ட நிலையில், மொத்த மதிப்பு 745.89 மில்லியன் டொலர் என தெரிவிக்கப்பட்டுள்ளது.

மேலும், ஒட்டுமொத்தமாக ஜனவரி 2025 இற்கான மொத்த ஏற்றுமதி வருவாய் 1,334.19 டொலர் மில்லியனாக அறிவிக்கப்பட்டமை குறிப்பிடத்தக்கது.