இங்கிலாந்து அணிக்கு இரங்கல் செய்தி!

ஆஷஸ் 74வது தொடரில் தோல்வியடைந்த இங்கிலாந்து அணிக்கு “The Australian” பத்திரிக்கை இரங்கல் செய்தியை வெளியிட்டுள்ளது.

ஐந்து போட்டிகள் கொண்ட ஆஷஸ் 74வது தொடரை அவுஸ்திரேலியா 3-0 என்ற கணக்கில் கைப்பற்றியுள்ள நிலையில் குறித்த இரங்கல் செய்தி வெளியிடப்பட்டுள்ளது.

தற்போது, 74ஆவது தொடர் அவுஸ்திரேலியாவில் நடைபெற்று வருகிறது.

இங்கிலாந்து அணித்தலைவர் பென் ஸ்டோக்ஸ், மற்றும் பயிற்சியாளர் பிரண்டன் மெக்கலத்தின் வழிகாட்டுதலில் அணி ஆஷஸ் தொடரில் களமிறங்கியது.

பாஸ்பால்’ ஆட்ட அணுகுமுறை,

இதில் மெக்கலத்தின் அதிரடி ‘பேஸ்போல்’ ஆட்ட அணுகுமுறை, இங்கிலாந்துக்கு கோப்பை வெல்ல உதவும் என நம்பப்பட்டது.

எனினும் மொத்தம் 11 நாள் மட்டும் நடந்த முதல் 3 டெஸ்டிலும் அவுஸ்திரேலியா வென்று, 3-0 என தொடரை கைப்பற்றியது.

இதையடுத்து ‘The Australian’ பத்திரிகை, அதன் கடைசி பக்கத்தில் ‘இரங்கல்’ செய்தி ஒன்றை வெளியிட்டுள்ளது.

இதில், “அன்புக்குறிய ‘பேஸ்போல்’ கிரிக்கெட்டுக்கு நினைவு அஞ்சலி. 2025, டிசம்பர் 21இல் இது, அடிலெய்டு ஓவல் மைதானத்தில் மரணம் அடைந்து விட்டது. ஸ்டோக்ஸ், பிரண்டன் மெக்கலம் அஞ்சலி செலுத்தினர்,’ என கேலியாக தெரிவித்துள்ளது.

இது கடந்த 1882இல் ‘லண்டன் ஸ்போர்ட்டிங் டைம்ஸ்’ பத்திரிகையில் வெளியான செய்தி போல அமைந்துள்ளதாக தெரிவிக்கப்படுகிறது.

அவுஸ்திரேலிய அணி, கடந்த 1882ல் லண்டன் ஓவல் டெஸ்டில் சிறப்பாக செயல்பட்டு, இங்கிலாந்து மண்ணில் முதல் வெற்றியை பதிவு செய்தது.

இரங்கல் செய்தி

இதுகுறித்து ‘லண்டன் ஸ்போர்ட்டிங் டைம்ஸ்’ பத்திரிகை கேலியாக வெளியிட்ட செய்தியில், ‘1882, ஓகஸ்ட், 29ல் இங்கிலாந்து அணி மரணம் அடைந்து விட்டது.

இதன் உடல் எரிக்கப்பட்டு, சாம்பல் (‘ஆஷஸ்’) அவுஸ்திரேலியாவுக்கு எடுத்துச் செல்லப்படுகிறது,’ என, இரங்கல் செய்தி போல குறிப்பிட்டது.

பின், 1883இல் அவுஸ்திரேலியா சென்ற இங்கிலாந்து அணி தொடரை 2-1 என வென்று பதிலடி கொடுத்தது.

இத்தொடரின் மூன்றாவது டெஸ்டில் பயன்படுத்திய ‘பெயில்ஸ்களை’, சில பெண்கள் எரித்து, அதன் சாம்பலை(ஆஷஸ்) 6 அங்குல நீளமுள்ள மண்ணால் ஆன, கலசத்தில் போட்டு, அப்போதைய இங்கிலாந்து கேப்டன் பிளிக்கிடம் வழங்கியுள்ளனர்.

அன்று முதல் இரு அணிகள் மோதும் டெஸ்ட் தொடருக்கு ‘ஆஷஸ்’ என பெயர் வந்தது.

இந்நிலையில் 4-வது டெஸ்ட் போட்டிகான இங்கிலாந்து அணி அறிவிக்கப்பட்டுள்ளது.

அதன்படி – ஜாக் கிராலி, பென் டக்கெட், பெத்தேல், ஜோ ரூட், ஹரி ப்ரூக், பென் ஸ்டோக்ஸ் (c), ஜேமி ஸ்மித், வில் ஜாக்ஸ், கஸ் அட்கின்சன், கார்ஸ், ஜோஸ் டங் ஆகியோர் அணியில் இடம்பிடித்துள்ளனர்.