இஷாரா செவ்வந்தி பின்னணியில் சக்திவாய்ந்த பாதாள குற்றவாளிகள்: நீதிமன்றம் அதிரடி உத்தரவு

கணேமுல்ல சஞ்சீவவின் கொலையில் ஒன்பது சக்திவாய்ந்த ஒழுங்கமைக்கப்பட்ட குற்றவாளிகள் ஈடுபட்டுள்ளதாகவும், அவர்களில் நான்கு பேர் வெளிநாடுகளுக்குத் தப்பிச்சென்று தலைமறைவாகியுள்ளதாகவும் கொழும்பு குற்றப்பிரிவு இன்று (7) கொழும்பு நீதவான் நீதிமன்றத்திற்கு தெரிவித்துள்ளது.

இந்த கொலையில் ஆறு ஒழுங்கமைக்கப்பட்ட குற்றவாளிகள் நேரடியாகத் தொடர்புடையவர்கள் என்றும் தகவல்கள் வெளியாகியுள்ளன.

கணேமுல்ல சஞ்சீவ கொலைச் சம்பவம் தொடர்பான வழக்கு இன்று கொழும்பு தலைமை நீதவான் அசங்க எஸ். போதரகம முன்னிலையில் விசாரணைக்கு எடுத்துக்கொள்ளப்பட்டபோது, ​​அந்த பிரிவின் அதிகாரி இதனை தெரிவித்துள்ளார்.

வழக்கு விசாரணை

இன்று வழக்கு விசாரணைக்கு எடுத்துக்கொள்ளப்பட்டபோது, ​​பூசா சிறைச்சாலையில் தடுத்து வைக்கப்பட்டுள்ள ஐந்து சந்தேகநபர்கள் ஜூம் தொழில்நுட்பம் மூலம் நீதிமன்றத்தில் முன்னிலைபடுத்தப்பட்டனர்.

மேலும், இந்த கொலையின் பிரதான சந்தேகநபர் இஷாரா செவ்வந்தி தப்பிச்செல்வதற்கு உதவியதாக சந்தேகத்தின் பேரில் விளக்கமறியலில் வைக்கப்பட்டிருந்த மூன்று ஆண் மற்றும் இரண்டு பெண் சந்தேகநபர்கள் சிறைச்சாலை அதிகாரிகளால் நீதிமன்றத்தில் முன்னிலைபடுத்தப்பட்டனர்.

இன்று வழக்கு விசாரணைக்கு எடுத்துக்கொள்ளப்பட்டபோது, ​​இதுவரை நடத்தப்பட்ட விசாரணைகளின் அறிக்கையை கொழும்பு குற்றப்பிரிவு அதிகாரி நீதிமன்றத்தில் சமர்ப்பித்தார்.

சம்பவம் தொடர்பில் தடுப்புக்காவலில் வைக்கப்பட்டுள்ள பல சந்தேகநபர்களிடம் விசாரணை நடத்தப்பட்டு, அவர்களிடம் வாக்குமூலங்கள் பதிவு செய்யப்பட்டுள்ளதாகவும், அதன் அடிப்படையில் மேலும் விசாரணைகள் நடத்தப்படும் என்றும் அந்த அதிகாரி கூறியுள்ளார்.

09 சக்திவாய்ந்த ஒழுங்கமைக்கப்பட்ட குற்றவாளிகள்

இந்த கொலைத் திட்டத்தை செயல்படுத்துவதில் 09 சக்திவாய்ந்த ஒழுங்கமைக்கப்பட்ட குற்றவாளிகள் ஈடுபட்டுள்ளதாகவும், அவர்களில் 04 பேர் தடுத்து வைக்கப்பட்டு விசாரிக்கப்படுவதாகவும் பொலிஸார் தெரிவித்துள்ளனர்.

இதற்கிடையில், காவலில் உள்ள சந்தேகநபர்கள் அதிகாரியால் கண்காணிக்கப்படுவார்கள் என்றும், சந்தேகநபர்கள் மீதான விசாரணைகளின் முன்னேற்றம் கோட்டை நீதவான் நீதிமன்றத்திற்கும், கொழும்பு நீதவான் நீதிமன்ற எண் 08க்கும் தெரிவிக்கப்படும் என்றும் கோட்டை நீதவான் தெரிவித்தார்.

மேலும், முன்வைக்கப்பட்ட உண்மைகளைக் கருத்தில் கொண்ட நீதவான், தற்போது விளக்கமறியலில் வைக்கப்பட்டுள்ள சந்தேகநபர்களை எதிர்வரும் 21 ஆம் திகதி வரை மேலும் விளக்கமறியலில் வைக்க உத்தரவிட்டுள்ளார்.

மேலும், வெளிநாடுகளுக்குத் தப்பிச் சென்ற சந்தேகநபர்களை உடனடியாக கைது செய்து நீதிமன்றத்தில் முன்னிலைபடுத்துமாறு பொலிஸாருக்கு நீதவான் மேலும் உத்தரவிட்டுள்ளார்.