யாழில் நடந்த கொலைவெறி தாக்குதல்! மேலும் மூவர் அதிரடி கைது

யாழ் நகரில் இளைஞன் மீது கொலைவெறி தாக்குதல் நடத்தியவர்களில் தேடப்பட்டு வந்த
பிரதான சந்தேக நபர்கள் என கருதப்படும் மூவர் கைது செய்யப்பட்டுள்ளனர்.

குறித்த கைது நடவடிக்கை இன்றையதினம்(07.01.2025) இடம்பெற்றுள்ளது.

தலைமறைவாக இருந்த குறித்த நபர்கள் யாழ் நகரில் நடமாடுவதாக யாழ் மாவட்ட குற்றத்
தடுப்பு பிரிவு காவல்துறையினருக்கு கிடைத்த இரகசிய தகவலுக்கமைய கைது நடவடிக்கை
முன்னெடுக்கப்பட்டுள்ளது.

தாக்குதல் சம்பவம்

யாழ் நகரில் புத்தாண்டுக்கு முன்தினம் (31) இரவு வேளை ஒன்றுகூடிய இளைஞர்கள்
குழுவினர் முச்சக்கரவண்டியில் சாகசம் காட்டியதுடன் இளைஞர் ஒருவரை கடுமையாக
தாக்கியிருந்தனர்.

அத்துடன், இது தொடர்பிலான காணொளி சமூக வலைத்தளங்களில் வைரலானது.

இந்நிலையில், கடந்த வியாழக்கிழமை(03) சந்தேகத்தின் அடிப்படையில் நான்கு பேர்
காவல்துறையினரால் கைது செய்யப்பட்டு விளக்கமறியலில் வைக்கப்பட்டுள்ளதுடன் இரண்டு முச்சக்கரவண்டிகளும்
கைப்பற்றப்பட்டுள்ளது.

மேலும், கைதான மூவரையும் யாழ்ப்பாணம் நீதிவான் நீதிமன்றத்தில் முற்படுத்த யாழ்ப்பாணம்
காவல்துறையினர் நடவடிக்கை எடுத்துள்ளனர்.