ஒழுங்கமைக்கப்பட்ட குற்றச்செயல் மற்றும் போதைப்பொருள் கடத்தல்காரர் கரந்தெனிய சுத்தாவின் நெருங்கிய உறவினர் பொலிஸ் விசேட அதிரடிப்படை அதிகாரிகளால் கைது செய்யப்பட்டுள்ளார்.
தென் மாகாண விசேட அதிரடிப் பிரிவின் அதிகாரிகளுக்குக் கிடைத்த தகவலின் அடிப்படையில் காலி, பிடிகல, வடுவெலிவிட்டிய பிரதேசத்தில் மேற்கொள்ளப்பட்ட சுற்றிவளைப்பின் போதே கைது இடம்பெற்றுள்ளது.
கடந்த மார்ச் மாதம் 11ஆம் திகதி பிடிகல, ஹொரங்கொல்ல பிரதேசத்தில் இடம்பெற்ற துப்பாக்கிச்சூட்டுச் சம்பவத்திற்கு பயன்படுத்தப்பட்ட ஆயுதத்தை ஒன்று சேர்த்தமை மற்றும் துப்பாக்கிச் சூட்டுக்கு உதவிய குற்றச்சாட்டின் பேரிலேயே சந்தேகநபர் கைது செய்யப்பட்டுள்ளார்.
மேலதிக விசாரணைகள்
இதன்போது சந்தேகநபரிடமிருந்து 20 கிராம் ஹெரோயின் போதைப்பொருளும் கண்டுபிடிக்கப்பட்டுள்ளதாக பொலிஸ் விசேட அதிரடிப்படையினர் தெரிவித்துள்ளனர்.
மோட்டார் சைக்கிளுடன் கைது செய்யப்பட்ட சந்தேகநபர் மேலதிக விசாரணைகளுக்காக பிடிகல பொலிஸ் நிலையத்தில் ஒப்படைக்கப்பட்டுள்ளதாக பொலிஸ் விசேட அதிரடிப்படையினர் மேலும் கூறியுள்ளனர்.