உள்ளூராட்சி சபைகளில் யாருக்கு ஆதரவு : சுரேஷ் பிரேமச்சந்திரன் அறிவிப்பு

இலங்கை தமிழரசு கட்சி மற்றும் அகில
இலங்கை தமிழ் காங்கிரஸ் ஆகியவை முன்னிலை வகிக்கும் இடங்களில் அவர்களுக்கு ஆதரவு வழங்க ஜனநாயக தமிழ் தேசிய கூட்டணி தயாராக இருப்பதாக ஜனநாயக தமிழ் தேசிய கூட்டணியின் முக்கியஸ்தர் சுரேஷ்
பிரேமச்சந்திரன் (Suresh Premachandran) தெரிவித்துள்ளார்.

குறித்த விடயத்தை நேற்றையதினம் (17) அவரது இல்லத்தில் நடைபெற்ற ஊடகவியலாளர் சந்திப்பிலேயே அவர் குறிப்பிட்டுள்ளார்.

இது தொடர்பில் அவர் மேலும் தெரிவிக்கையில், “எம்மை பொறுத்தவரையில் வடக்கு கிழக்கு மாகாணங்களில் இப்போது இருக்கக்கூடிய
ஆளும் தரப்பு உள்ளூராட்சி சபைகளை கைப்பற்றுவதை தவிர்த்து தமிழ் தேசியப்
பரப்பில் இருக்கக் கூடியவர்கள் இந்த மாகாண ஆட்சி அதிகாரங்களை பெற்றுக்கொள்ள
வேண்டும் என்ற முயற்சியில் தான் நாங்கள் ஈடுபடுகின்றோம்.

அந்தவகையில், அகில
இலங்கை தமிழ் காங்கிரஸ் அதிக ஆசனங்களை வைத்திருக்கும் இடங்களில் அவர்களுக்கு
ஆதரவு தெரிவிப்பதாகவும் நாங்கள் தெரிவித்திருக்கின்றோம்.

பல இடங்களில் தமிழரசு கட்சி முன்னிலை வகித்தாலும் அறுதிப் பெரும்பான்மை என்ற
விடயங்கள் பெரும்பாலான இடங்களில் இல்லை.

ஆகவே ஆட்சி அமைப்பதற்கு அவர்களுக்கு
ஏனைய கட்சிகளின் ஆதரவுகள் தேவை, எங்களிடமும் அந்த ஆதரவை கோரியிருந்தார்கள்.

ஆகையால், அவர்களுக்கான ஆதரவுகளையும் நாங்கள் வழங்குவதற்கு தயாராக
இருக்கின்றோம்” என அவர் தெரிவித்துள்ளார்.